WILLEMSTAD – No ta eksistí un instansha formal pa limpia shushi den laman na Kòrsou. Asina a sali ora a informá serka Servisio di Medio Ambiente, e X-team ku mester buska shushi ku a benta ilegalmente, i serka Selikor. Nan tur ta mustra dede riba otro.
Algun ref rònt di e isla ta masha shushi. Meskos ku e bahia di e pueblo di piskadó Bok’e Samí, kaminda regularmente ta tira shushi na laman. Den fòndu di laman por haña entre otro tabla di strika, trapi i fèn.
Na aña 2015 e organisashon non-profit merikano Waitt Institute den koperashon ku Blue Halo a investigá e estado di e refnan rònt di Kòrsou. Den e investigashon a parti Kòrsou den sinku zona. Bok’e Samí ta keda den e zona di mas shushi di kosta sùit. Awa di riol ta basha den laman i ta tira shushi den laman.
No tin maneho
Site manager Endirah Palm na nòmber di White Institute ta duna konseho na gobièrnu pa loke ta un maneho duradero di laman. “Aktualmente ta falta maneho. Nos ta boga pa traha legislashon pa protehá bida marítimo. Nos ta spera di logra den dos aña.”
Koral na aña 1982 i na 2015. (klek pa hasi mas grandi) Grafik: rapòrt di Waitt
No ta e ref na Bok’e Samí so ta den mal kondishon. Kompará ku 1982 e kondishon di henter e ref rònt di Kòrsou a bai atras. Aktualmente tin ménos koral i mas shushi.
Na tera diferente organisashon ta limpiando e shushi ku a tira ilegalmente. Pero pa limpia den laman no tin niun instansha.
‘Si gobièrnu no hasié nos mes ta hasié’
De bes en kuando e industria di sambuyamentu si ta organisashon aktividatnan di limpiesa. Kompletamente boluntario hende lokal i turista ta yuda limpia. Hans Pleij, ku a lanta Curaçao Clean Up, ta trese e skolnan di sambuyá i boluntario huntu. “Si gobièrnu no hasié, ta nos mes lo hasié.”
Bok’e Samí ta un di e lugánan kaminda regularmente nos ta sambuyá i limpia”, Pleij ta bisa. Ei bou nos ta haña stof, frizer, mitar boto, kiko ku bo ke.”Segun Pleij Yu di Kòrsou ta okupá nan mes espesialmente ku shushi ku por mira. “Bo no por mira shushi den fòndu di laman. Ta p’esei no ta tuma e problema muchu serio.”
Pleij ta trata di haña supsidio di gobièrnu pa por hasi e akshonnan na un eskala mas grandi. Pero por lo pronto e no tin nodi di ferwagt niun kontribushon.
‘Sin boluntario nos lo no logra’
Gobièrnu no tin sèn pa paga instansha pa limpia e refnan, minister di Salubridat, Medio Ambiente i Naturalesa, Suzy Camelia-Römer ta bisa. “E pais mester ekonomisá miónes, ke men nos mester ta kreativo. Mi ta masha honesto den esaki: Sin boluntario nos lo no por logra.”
Carlos Constancia i Nelson Tremus, dos piskadó di Bok’e Samí, ku nan mes wowonan ta mira ku nan laman ta bira mas i mas shushi. “Tin famia ku ta bai keiru na playa anto ora nan kaba di kome i bebe nan ta tira tur nan shushi den laman.”
Edukashon i prevenshon
Segun Constancia i Tremus por gana algu den enseñansa. “Mucha no sa kiko ta e konsekuenshanan ora bo tira shushi den laman, nan mester siña esaki.”
Segun Camelia-Römer prevenshon ta mihó ku drechamentu. “Mester di mas atenshon pa prevenshon. Nos mester siña mucha kiko ta balor di naturalesa. Ta p’esei aktualmente nos ta desaroyá programa edukativo pa krea mas konsientisashon. Mucha mester siña trempan ku nan mester prosesá nan shushi na un manera responsabel.”