Portrèt: Ronald A. Muyden

KRALENDIJK – “Nos a firma un akuerdo di gobernashon. Esaki no ta un instrukshon. Si tabata asina nos lo a yam’é asina.” Sekretario di Estado di Asuntunan Interior i Relashonnan den Reino (BZK) Raymond Knops den un enkuentro ku prensa djárason ta indiká ku en bèrdat tin un diskushon tokante di esaki. “Pero e akuerdo ku tin awor ta duna tur espasio, espesialmente pasobra e ta sali for di prioridat ku Boneiru mes a trese.”

E mandatario ta bisa ku e akuerdo no ta bashá den beton. “E akuerdo tin espasio tambe pa e miembronan nobo di konseho insular ku a kaba di elegí i un Kolegio Ehekutivo nobo despues di elekshonnan di 20 di mart, pa kuminsá traha kuné.”

‘Muchu optimista’
Na yanüari Knops a konstatá ku algun kos mester bai mihó den maneho di Boneiru. Kolegio Ehekutivo lokal a bini ku plan pa mehorashon di integridat i maneho finansiero. Ku e intenshon pa ‘kaba promé ku zomer’. Esaki ‘kisas tabata poko optimista’, segun Knops.

Knops ta bisa ku e Akuerdo di Maneho ‘di ningun manera no ta perhudiká e derecho demokrátiko di Boneiru’. E kompetensianan no ta kambia, segun e sekretario di estado, i ta ta keda inafektá. “Meskos ta konta pa e kompetensianan di Kolegio Ehekutivo. Di Gezaghebber òf eilandssekretaris tambe. Ta bini un kompetensia aseka si, un organisashon di proyekto.

Knops ke men un ofisina di programa ku ta sirbi komo un instrumento konhunto pa monitòr i guia, pa asina logra e palabrashonnan ku a hasi den e akuerdo di gobernashon. Ta deseo di tantu gobièrnu lokal komo di Reino pa haña un manager di programa ku tin afinidat ku entre otro idioma i kultura di Boneirui. E manager aki – ku no ta liá na un di e partidonan – di tur manera ta responsabel dos aña largu pa ‘ehekushon di e total, ta konektá resultado di partidonan i ta tene nan responsabel pa progreso, palabrashon, uso di medionan, desishon etc. ’

Sekretario di Estado SZW lo ta na BES pronto
Vorman Robby Beukenboom di Frente Sosial progresivo (FSP) komo partido di koalishon ta kontentu ku ‘porfin awor tin algun palabrashon, dirigí solamente na Hulanda Karibense, ku resultado pa pueblo di Boneiru.’ E akuerdo tin sierto aspekto di e mínimo sosial deseá, ku Den Haag no a registrá ainda pa e tres munisipionan ekstraordinario di Hulanda, di kua Boneiru tambe ta forma parti.

Sekretario di Estado di Asuntunan Sosial i Empleo (SZW) Tamara van Ark segun Beukeboom pronto lo paga un bishita na islanan BES. “Nos lo splika desentemente ku nan punto di bista tokante un mínimo sosial no ta esun korekto”, Beukeboom ta bisa. Den un deliberashon di Parlamento hulandes na sèptèmber e sekretario di estado di SZW a bisa ku na 2020 lo bini un evaluashon pa por establesé e mínimo sosial pa Boneiru, Sint Eustatius i Saba.

E akuerdo di gobernashon tin palabrashon konhunto tokante entre otro mas kas sosial, awa, koriente, empleo òf ‘jobprogram’ , drecha kaya, maneho di integridat, i areglo pa akohida di mucha.

No unánimamente
E frakshon di un persona di Partido Demokrátiko Boneriano di Clark Abraham tabata e úniko persona konserní ku no a firma e dokumento.

Algun manifestadó a bini e firmamentu di e akuerdo di gobernashon. Potret: Ronald A.Muyden

Tabatin un grupito di mas o ménos dies manifestadó. Dos di nan tabatin un bandera grandi di Boneiru. Vladimir Mercera (potrèt) tabatin un bandera asina i el a indiká ku e ta prekupá pa outonomia di Boneiru despues di e firmamentu di e akuerdo di gobernashon. Tabatin krítika tambe riba Gezaghebber Edison Rijna pasobra e manifestantenan no tabata haña nèchi ku e firmamentu di e akuerdo di gobernashon tabata solamente pa prensa i no pa públiko.