WILLEMSTAD – Mester dekolonisá nos enseñansa i evitá ku nos ‘mentenan’ ta sigui bai den eksterior i en bes di kontribuí na desaroyo di nos pais, nan ta yuda ekonomia di otro paísnan krese. Ta p’esei mester evaluá e seramentu di kombenionan ku vários universidat internashonal.
Rector Magnificus di UoC, Francis Delanoy a ekpresá su preokupashon, pa e echo ku miéntras ku den Regio, e universidatnan ta traha riba fortifikashon i koperashon pa mantené e studiantenan den nan mes pais, nos ta manda nos studiantenan bai afó, ku e riesgonan ku esaki por trese kuné.
Francis Delanoy den kòmbersashon ku Dulce Koopman
Rector Magnificus resientemente tabata na Sto.Domingo, kaminda ku e organisashon di Universidatnan den Caribe i sentronan di investigashon, UNICA ,- di kua Rector Delanoy ta vise presidente- a selebrá su di 50 aniversario. Na e okashon aki a re-inventá UNICA i kambia su nòmber den Universities Caribbean. Delanoy: “Un organisashon kaminda tur universidat di region a uni pa defendé interesnan i propagá estudio den Karibe”.
Rector Magnificus Francis Delanoy
Francis Delanoy ta partidario pa dekolonialisá nos enseñansa. “E mester bira ku e ta forma hende, ku di bèrdat tin balor propio pero ku alabes ta komprondé su konteksto”. ‘Tantu bal manda un studiante di por ehèmpel 18 aña Hulanda óf Merka, kaminda e ta siña un kultura i haña su formashon i na regreso aplik’é na Kòrsou, algu ku kisas no ta fit den nos komunidat’.
Ta p’esei mester usa e base fuerte di Caribe. I gran parti di Caribe ta kla pa hasi esaki tambe, ta solamente Kòrsou falta pa traha riba esei, segun Rector Magnificus, Francis Delanoy.
UoC ta determiná pa kontinuá ku su programa di regionalisashon i internashonalisashon i ta apliká komo punto di salida, base igual di kapasidat ku tur otro partner.