Portrèt: Jacqueline Hooftman

WILLEMSTAD – Djárason 5 di desèmber, nueb’or di meinta. E ora ku e kondená Gerrit Schotte lo mèldu na prizòn. E lider di MFK ta konta ku su siguidónan masalmente lo kompañ’é te na porta di prizòn: “Nueb’or shonnan! E ora ei e ora a yega.” E èks promé minister di Kòrsou ta kondená pa korupshon i labamentu di plaka.

E ta prekupá pa su famia, e ta puntra su mes kon lo para ku su kasá i su yunan den dianan di Pasku i di Aña Nobo. “Mi no por pensa riba nada otro”, Schotte ta bisa. Kiko esaki ke men pa mi famia? Kon esaki lo influenshá e muchanan?”

Outor Jacqueline Hooftman

Schotte a kaba di yega for di Colombia kaminda el a hasi un eksaminashon médiko. “Mi kolèsteròl ta poko haltu, pero por lo demas mi ta salú”, e ta bisa, miéntras ku e ta tene e fail médiko ku el a haña na un klínika privá den laira. Físikamente mi mester por wanta e estadia den prizòn.”

Banchi na ènkel
Na delaster momentu su abogadonan a entregá un petishon na korte pa lag’é tuma su kastigu na kas, bou di vigilansia elektróniko. Ku un banchi na ènkel. Pasobra e ta tata i su yunan mester di dje. Pasobra e ta un persona prominente den komunidat. I pasobra e ta lider di un partido polítiko i e trabou ei ta sigui normal.

Pero na korte no tabatin espasio den agènda pa trata e petishon aki, asina e kontesta por eskrito ta bisa. Schotte, ku un kara furioso: “No tabatin tempu. Pakiko esaki no ta straña mi?”

No tin posibilidat di un trato di preferensha. Vigilansia elektróniko mayoria parti ta pa detenido ku tabata será e parti mas grandi di nan kastigu kaba i ku a komportá bon. E lider di MFK mester keda será por lo ménos dos di e tres añanan ku a konden’é na dje, pa bini na remarke pa un banchi di ènkel.

“Mi ke sosegá den prizòn”
-Gerrit Schotte

Djarason ora e mèldu, promé e ta bai papia ku direktor di prizòn Urny Floran, Schotte a bisa. “Mi ke tende di Floran kiko ta mi chènsnan den prizòn. Kòrda bon, ei tambe mi tin rival. Nan lo hasi tur kos posibel pa hasi mi bida difísil. Anto mi no tin masha gana di esei.”

“Mi a haña basta kastigu kaba, segun mi”, Schotte ta sigui. Realmente mi a haña kuater kastigu: mi mester bai será tres aña. Durante sinku aña no por elegí mi. Den e mésun temporada tampoko mi no por vota. I mi mester paga 1.8 mion. Si mi no por paga, mi kastigu lo bira dòbel, di tres pa seis aña.” E ta suspirá: “Bo ta komprondé: mi ke evitá mas doló di kabes. Den prizòn mi ke sosegá.”

‘Plaka di un empresario’
E ta bai pasobra e mester bai, pero su defensa lo sigui, Schotte ta bisa. “Mi ta e úniko lider polítiko den historia di e pais aki ku a kondená pa tumamentu di plaka pa finansiá e kampaña polítiko di nos partido. Mi no a tuma ni un depchi di pueblo, nò, plaka di un empresario. Tur partido polítiko ta hasi esei. Ta ami so a nan kondená p’esaki.”

E ta víktima di un persekushon polítiko di hèks, segun Schotte. “Lo bini un dia ku e wega shushi aki lo sali na kla, ku bèrdat lo sali na kla.” Mes ora despues di e konferensha di prensa su partido MFK a rifa un outo.