KRALENDIJK – E instansha pa kuido di salú Fundashon Mariadal (FM) no ta rekonosé Federashon General pa Trahadó Boneriano (AFBW) mas komo partner di kombersashon. Esaki pasobra e bònt no ta inskribí na Kámara di Komèrsio i no ta registrá na notario segun e leinan nobo. Segun e forman di AFBW Nilco Rollan esaki ta pará den un ‘karta denigrante’ di maneho di FM.
Asina e negosiashonnan pa un CAO nobo pa e trahadónan den kuido na FM a kai den un impase atrobe, Rollan ta bisa.
Areglo di Labor na lugá di un CAO
E presidente di e sindikato ta haña esaki un ‘manera inhustu i intrigante’ di maneho di FM. “Nos a ferwagt ku, ku e bon relashon ku nos tabatin ku FM, nan por a yama nos na telefon i hala nos atenshon riba esaki.” Ademas FM no ta retené e kontribushon di AFBW mas i despues di 31 di desèmber ora e CAO aktual vense, lo introdusí un areglo di labor.
Bèk pa e miembronan
Fin di ougùstùs minister Wouter Koolmees di Asuntunan Sosial i Empleo (SZW) a ordená e dos partidonan pa bai sinta rònt di mesa ku un mediador di gobièrnu. Asina segun lei e por a para e akshonnan di e tempu ei. E periodo di plakia kontroversia di nobenta dia ku ademas e minister a proponé si dado kaso e partidonan ainda no bini kla, a pasa.
Segun Rollan Fundashon Mariadal no a reakshoná riba e proposishon entre medio di e mediadó di gobièrnu. Djabièrnè awor AFBW ta reuní ku su miembronan pa mira ki mandato nan ta haña pa akshon mas aleu.