WILLEMSTAD – Durante di e ‘After Fuik Clean-up’ ta kalkulá ku djasabra a saka mas o ménos mil kilo di shushi for di laman. Esaki ta komparabel ku e akshon di limpiesa di aña pasá, pero e aña aki a saka relativamente mas glas i ménos plèstik.
Fuikdag ta un fiesta grandi di tur aña riba laman na bahia di Fuik na Kòrsou. E fiesta no ta kai bou di un organisashon ofishal i p’esei ta difísil pa regul’é. Wardakosta ta responsabel pa seguridat riba laman, pero niun hende no ta responsabel pa e shushi ku ta laga atras den laman. Ta boluntario ta pèrkurá pa e limpiesa.
Mas glas
Segun e kordinadó di e clean-up, Hans Pleij, e 76 sambuyadonan a saka espesialmente bòter, bleki, kolchon di airu i bala di playa for di e bahia di Fuik. E echo ku a saka mas glas ku plèstik e ta mira komo un desaroyo positivo. “Na promé lugá ta keda asina ku ainda tin muchu shushi ta keda atras, pero glas no por hasi tantu daño na naturalesa manera plèstik”, Pleij ta splika.
Banda di esaki mésora e ta remarká ku ta di un organisashon – ku e no ke menta ku nòmber pero ku ta konosí ku ta trata di Cabana Beach – a haña hopi bala di playa di plèstik. “E mayoria a resultá den e palunan di mangel, pero ta tin hopi riba fòndu di laman tambe. Nos sambuyadónan pa e okashon aki a usa nan komo saku di shushi.”
Pleij tin ocho aña kaba ta organisá clean-up bou di awa. E tin gana di drenta den kombersashon ku e organisashon pa hasi nan konsiente di e konsekuenshanan ku un akshon di marketing asina, ku ta parse grasioso, por tin pa naturalesa.
Prohibishon di plèstik ku ta usa un bia so
Tur bishitante di Fuik otro aña mester paga tinu mihó riba uso di plèstik. Parlamentario Giselle McWilliam ta trahando riba un kambio di lei pa taha uso di plèstik ku ta usa un bia so. Aktualmente e ta finalisando e proposishon di lei ku na mart e ke presentá na parlamento. E lei lo mester drenta na vigor promé ku fin di 2019.
Hopi charter grandi i ‘partyboat’ manera Nachtwerk, BlueFinn i Miss Ann, e aña aki kaba no a usa kùp di tira afó, pero kùp duru ku e bishitantenan di fiesta por a re-usa. E doño di HFTG, Alain Voigt, otro aña ke bai fasilitá su pasaheronan tambe den esaki. E aña aki ainda el a pidi su pasaheronan pa nan mes trese un kùp re-usabel.
Medida
Na BlueFinn Charters tambe urgi e pasaheronan pa laga mas poko posibel shushi atras. “Komo nos mes no ta produsí shushi ta tur loke nos por hasi”, segun office captain Stijn Stroeve. BlueFinn no tin plan pa kambio grandi pa otro aña. “Nos ta pensa si pa duna nos bishitante nan nèt chikí, ku durante e fiesta nan por saka sushi for di laman kuné.
Banda di esaki Voigt ta aludí na un sistema di bòrg pa pèrkurá pa tur pasahero bai kas bèk ku nan artíkulonan di airu. “Pasobra e aña aki atrobe tabatin sentenar di ‘floatie’ ku a keda atras den e bahia.”