WILLEMSTAD – E komunidat Venezolano na Kòrsou ta spera ku nos gobièrnu lo uní ku e sobra paisnan ku a rekonose Juan Guaido komo presidente interino, Mary Goiri, representante di VENEUROPA na Kòrsou, a deklara.
Djarason último, aproksimadamente 400 demostrante venezolano a reuní na parke Wilhelmina pa duna oído na e yamada.
Reportahe di Deya Mensche y Kim Hendriksen
“E desaroyo aki ta un renasimientu di nos país”, Goiri a splika. E demostrantenan ta kontentu pa mira ku gobièrnu di Kòrsou ni Hulanda a asistí na e inaugrashon di Maduro dia 10 di yanüari último, enfatisando e ilegitimidat di Maduro su presidensia. Pero nan ke mas, e rekonosementu di e presidente interino nobo.
Dos kampamentu
Awó ta reina dos kampamentu polítiko unda paisnan manera Merka i Canadá, banda di paisnan den región manera Colombia, Brasil, Argentina i Perú ta rekonose e líder di oposishon Guaido komo presidente interino. Esaki no ta konta pa Europa ku solamente a indika ku presidente Nicolás Maduro mester baha. Riba e punto aki, Hulanda, meskos ku Kòrsou, ta siguí Europa.
Rusia i Turkia na nan turno ta sostene Maduro i a hala Merka su atenshon riba esaki.
‘Kòrsou mester mira leu ku su interesnan polítiko’ –manifestante Freddy Ramos
Según e demostrantenan na Kòrsou tin speransa ku kos ta bai drecha pa motibu di e desaroyonan aktual, pero nan ta teme ku e situashon di e imigrante venezolano awó lo bira aún mas prekario. “E gobièrnu di Kòrsou mester tende mas miho, i wak mas aleu di e interesnan polítiko, paso tin e aspekto humanitario tambe pa konsidera”, Freddy Ramos a deklara.
Según Ramos, Hulanda por yuda pone más preshon riba Maduro pa baha, pa asina un gobièrnu ku realmente ta traha pa e pueblo por goberna.