KRALENDIJK – Media na Boneiru mes ta indiká ku nan mester di ayudo pa mehorá prensa na Boneiru. Esaki a sali promé di febrüari durante e selebrashon di 5 aña Ret Karibense na Boneiru.
“Media na Boneiru ta bon i adekuá pero: mester por mihó. Gustosamente nos ke ke koperá ku e desaroyo di talento di emisora públiko. I fondo p’esaki”, Bubui Cicilia di Bon FM, un di e miembronan di e pènel, ta bisa.
E otro miembronan di e pènel di e anochi ei – Boi Antoin di Extra Boneiru, Ahmed Ayubi di Live 99FM i Wim Romeijn di Amigoe Bonaire – tambe ta habrí p’esaki.
‘Bo mester sigui gana bo pan si’ – periodista Bubui Cicilia
E sala ku entre otro lesadó, spesialista di komunikashon i tambe gezaghebber Edison Rijna ta konfirmá esaki pasobra mayoria no ta satisfecho ku prensa lokal. Nan ke mas profundisashon i nan tin falta di e preguntanan krítiko ku e periodistanan mester sigui puntra.
Silvia de Leon ta atmití ku e tin difikultat pa sigui puntra. “Ku Raymond Knops ku tabata di bishita poko tempu ei, mi tin difikultat di sigui puntra pasobra e ora ei mi ta sinti falta di edukashon periodístiko.”
E miembronan di pènel ta bisa ku nan ta komprondé e deseonan di públiko pero ku falta di tempu hopi bia ta stroba profundisashon di e notisianan. “I bo mester sigui gana bo pan si”, segun Cicilia.
Ora puntra si mester di un emisora públiko separá pa Boneiru pa duna notisia independientemente, e opinion nan ta varia. Periodista Romeijn ta avisá ku un emisora públiko no mester bira kompetidor di e emisoranan eksistente komersial na e isla.
Miembronan di pènel di robes pa drechi: Wim Romeijn, Boi Antoin, Bubui Cicilia i Ahmed Ayubi – Potrèt: Ret Karibense
Lucia Beck di Rijksdienst Caribisch Nederland ta remarká ku último dies aña tin un kresementu grandi serka periodista lokal: “Si awor mi tene konferensia di prensa, no tin sufisiente tempu mas pa tur pregunta. Ántes mi tabata haña un pregunta so. E periodistanan ta bini mihó prepará tambe.”
Edukashon
Tur miembro di pènel i públiko ta habrí pa edukashon i prekondishon pa un prensa mihó i mas independiente. Ku sosten di emisora públiko.
Pasobra prensa lokal mes no ta alkansá prekondishon esensial manera un kódigo di media i un statüt di redakshon. Ta trata tambe di un separashon estrikto entre propaganda i obra periodístiko. I sin koló polítiko.
Un lesadó ta bisa ku no mester por t’asina ku un periodista bistí na un flanèl di un partido polítiko ta entrevistá un polítiko na televishon. “Bo ta ripará tambe ku emisora di radio ta invitá algun polítiko tres, kuater bia i laga nan sigui bash’abou. Anto no ta invitá e otronan nunka.”
‘Diputado tambe mester siña ainda. Esei ta e e kaso tambe na prensa’- gezaghèber Edison Rijna
Frans Jennekens, hefe di NTR-diversidat ta laga sa ku Ret Karibense ke invertí mas den desaroyo di talento. “E medio mester krese bira un ret di periodista independiente.”
Pènel i públiko a aploudí esaki. Prensa boneriano ademas ta masha interesá den e Unesco Media Masterclass-nan ku a tene na aña 2013 na Kòrsou, ku tambe Renske Pin, bou di enkargo di Unesco. Pin tabata e keynote speaker durante di e selebrashon na Boneiru.
Gezaghèber Rijna na final a remarká ku edukashon ta nesesario. “Pasobra den gobernashon lokal tambe ta awor numa tin un kódigo di kondukta pa diputado. Pa asina un diputado no por ta importadó di papel tambe. Nos mester siña esaki ainda. i esaki ta e kaso serka prensa tambe.”