WILLEMSTAD – Despues ku Hulanda a anunsiá ku Kòrsou lo bira un di e hùbnan logístiko humanitario pa ayudo di Estádos Unídos i otro pais na Venezuela, e promé minister di Kòrsou ta enfatisá ku esaki no ta nifiká un akshon di ayudo militar.
“Ta trata aki di un operashon di ayudo sivil, no un akshon militar”, segun promé minister Eugène Rhuggenaath. E ta kompará e ayudo ku esun pa Sint Maarten despues ku e isla aki a kai víktima na orkan Irma.
‘Nos ke evitá e persepshon ku nos ta mete den e mando militar di Venezuelá’- promé minister Eugene Rhuggenaath
“Ta trata di distribushon di pakete di kuminda, material i remedi. Pa asina e NGO-nan di otro pais via nos aeropuerto i haf por fasilitá e transpòrt di esakinan.”
Despues di orkan Irma tambe Hato tabata un brùg aéreo pa artíkulo di emergensia internashonal. Rhuggenaath: “Nos ke evitá e persepshon ku nos ta mete den e mando militar di Venezuela. Aki tambe hende ta masha prekupá pa motibu di e situashon ekonómiko malu di e pais, loke sigur nos ke redusí ku e ayudo humanitario awó.”
Ta nifiká ku no tin nodi di usa e base militar FOL di Merka na Kòrsou. E bosero suplente di Defensa Área Karibense ta bisa ku ainda gobièrnu no a hasi un petishon pa ayudo. “Mi no por spekulá ku, ni ki ora, nos lo risibí esaki. Pero te ainda no a apelá na defensa di Área Karibense”, segun Alex Kranenburg.
1 mion pa Krus Kòrá
Den un karta na Tweede Kamer (parlamento di Hulanda) e ministernan hulandes Stef Blok (Asuntunan Eksterior) i Sigrid Kaag (Komèrsio Eksterior i Koperashon di Desaroyo) a primintí un mion euro tambe na Krus Kòrá hulandes. Ku e plaka aki mester yuda Krus Kòrá venesolano i otro programa di ayudo den e region.
Ainda Hulanda no a reakshoná riba e di dos petishon pa ayudo ku Kòrsou a hasi poko tempu pasa, asina por lesa tambe den e karta di parlamento hulandes. Riba 1 di februari Aruba a pidi Hulanda sosten den e prosedura di asilo. Ta wak esaki ‘ku klemensia’, segun e ministernan. Gabinete hulandes ta bisa ademas ku nan ta dispuesto pa ‘duna sosten den otro reto’. Manera futuro di e refineria di Kòrsou i e garantia di suministrashon di kombustibel na por ehèmpel Boneiru.