WILLEMSTAD – Hogeschool Rotterdam ta ninga ku studiante kurasoleño i arubiano no ta bonbiní pa motibu di mal resultado di slag pa èksamen. Al kontrario, Hogeschool Rotterdam a obligá su mes di yuda baha e kantidat di studiante ku no ta kaba nan estudio. Asina Irene Kastaneer ta bisa. E ta representante di Hogeschool Rotterdam na Kòrsou.
Irene Kastaneer den kombersashon ku Dulce Koopman
Kastaneer ta kordinadó di e proyekto ‘Subi Jet pa bo Get’. Esaki ta un programa preparatorio na Kòrsou i Aruba pa studiante ku ta bai studia na Hogeschool Rotterdam. Ta trata tópiko manera idioma, diferensia kultural, traha bùdjèt i abilidat di studia. Pero e programa mester ta mihó.
Mihó konseho
E trainernan di e programa preparatorio kuminsamentu di febrüari a bai Rotterdam pa finalisá e mehorashonnan pa e programa. Trainer Sennon Kastaneer a partisipá na e enkuentronan aki na e skol. “No ta bèrdat ku e studiantenan no ta bonbiní mas. Loke sí ta importante ta ku e programa ta kuadra mas ku e nesesidatnan di e studiantenan i ku nan ta haña un konseho mas kla despues di nan chèk di eskoho di estudio. Ke men por sosodé ku nos ta konsehá studiante ku ta hóben òf di kua e hulandes ta suak, pa sigui un estudio na nan isla promé.”
E kantidat di studiante for di e parti karibense di Reino ku no ta kaba nan estudio ta masha haltu. E Hogeschool aña pasa a laga sa ku nan no ke tuma studiante mas di Kòrsou i Aruba. E skol na yüni a insistí serka e minister hulandes di enseñansa Ingrid van Engelshoven pa obligá studiante karibense pa sigui un programa di entrada.
Universidat di Aruba algun aña kaba tin un aña spesial ku ta prepará studiante pa studia na Hulanda òf Merka. Por ehèmpel ta duna nan lès èkstra di hulandes òf abilidat di studia.
Despues di e enkuentro di kuater pais tokante enseñansa na febrüari, Kòrsou, Aruba, Sint Maarten i Hulanda a forma un grupo di trabou pa investigá pakiko hopi studiante karibense no ta haña nan diploma.
Studiante i trainer di Subi Jet pa bo Get di Kòrsou i Aruba ku Ron Bormans di e Kolegio di Direktiva di Hogeschool Rotterdam. Potrèt: Subi Jet pa bo Get
E tópiko ta ripití
Studiante ku no haña diploma mester paga nan fiansa di estudio i di gastu di OV bèk i hopi bia ta keda Hulanda pa traha. E miembro di Tweede Kamer pa D66 Jan Paternotte durante e Deliberashonnan Interparlamentario luna pasá na Sint Maarten a enfatisá ku e enseñansa avansá na Hulanda mester kontribuí na e desaroyo di Hulanda Karibense. Ke men ku studiante mester regresá ku un diploma den nan saku. “Esei ta un tópiko tambe ku ketu bai ta bini bèk den e komishon di Tweede Kamer pa Relashonnan den Reino.