KRALENDIJK – Dòkter di kas, dentista, un botika i un laboratorio na Boneiru no tin un kòntrakt ku e kompania lokal ku ta prosesá shushi Selibon. Ku konsekuensha ku un trato spesial di nan shushi (bio)médiko no ta garantisá.
Ku esaki e munisipio ekstraordinario hulandes no ta kumpli ku e direktivanan internashonal ku ta na vigor pa trato i prosesamentu di shushi biomédiko i infeksioso.
Outor Ronald A. Muyden (Na Hulandes)
Bou di shushi (bio)médiko i infeksioso ta kai sanger (ku no a seka), material kontaminá, ferbant shushi, djente, shushi kímiko manera amalgama, parti di kurpa. Tur ta shushi ku ta kai den kategoria dos i tres di material peligroso.
Ki riesgo di seguridat, di salubridat i di medio ambiente esaki ta trese kuné spesífikamente i kon por ta ku e práktikanan ainda no tin kòntrakt, no ta kla. Un petishon pa un reakshon riba esaki di Selibon i gobièrnu lokal a keda sin kontestá te ainda.
Na Kòrsou tambe tin problema ku shushi médiko
|
Angua usá
Na Sentro Médiko Boneiru, un di e shete ofisinanan di dòkter di kas na e isla, un trahadó ta konta ku ta angua usá so nan ta tira afó den un baki di tira shushi spesial koló kòrá. Sobrá di nan shushi médiko ta tira den kliko huntu ku otro shushi.
Muchu karu
Un otro instansha, ku ke keda anónimo. ta deklará ku e ta habrí pa sera un kòntrakt, pero e ta haña ku ‘un kòntrakt asina ta kosta hopi sèn’. Segun un plan di enfoke di Selibon di 2013 e instanshanan di salubridat ku aktualmente no tin kòntrakt tabata produsí 6.436 kilo di shushi biomédiko i infeksioso pa aña. Fundashon Mariadal e tempu ei tabata produsí anualmente mas o ménos 6.100 kilo di shushi peligroso.
Polítika: ‘mester hasi lihé
Den un entrevista di Ret Karibense riba 19 di febrüari ku diputado James Kroon, ku tin Selibon tambe den su kartera, Kroon ta konta ku mester hasi lihé pa e práktikanan aki tambe sera un kòntrakt. Te awe no tin klaridat tokante esaki.
Ronald A. Muyden den kombersashon ku James Kroon (Na Hulandes)
Download e audio aki
Salubridat públiko
Na yüli di 2017 na Boneiru a kuminsá kima shushi biomédiko i infeksioso. Ántes tabata dera esaki na landfill huntu ku sobra shushi, despues den baki di shushi spesial blou i saku kòrá .
Segun Cherel Kwidama, kordinadó Kalidat, Arbo, Medio Ambiente i Seguridat di Trabou na Fundashon Mariadal e instansha internamente ta parti e shushi peligroso aki segun regla spesial for di Hulanda kon ta trata ku shushi di hòspital.
Opheto skèrpi manera angua, material kontaminá, parti di kurpa i órgano, plasènta, shushi líkido, remedi, ta kolekta separá, sera hermétikamente den material spesial pa warda kos i aparato ku tin un marka di kùr di seguridat di Nashonnan Uní. “Esaki ke men ku ta difísil pa hasi daño òf lèk”, Kwidama ta splika.
Fundashon Mariadal so tin kòntraktSelibon tin un kòntrakt si ku e instansha di salubridat Fundashon Mariadal. E instansha aki ta konsistí entre otro di un hòspital, un poliklínika, un laboratorio, un sentro di dialisá, kas di kuido, i botikario. Fundashon Mariadal ta produsí shushi ku ta kai den e kategoria di mas haltu di material peligroso: kategoria 1. Motibu pakiko Randy Leonora, operation manager di Selibon komo promé a sera un kòntrakt. |