ALMERE – For di djamars Almere ta honra su deportistanan ku ta kampion oropeo, mundial òf olímpiko ku un ‘Wall of Fame”. Pero e deportista di mas legendario di Almere ta falta riba e muraya: Kòrsou su landadó kampion di ántes Enith Brigitha.
For di aña 1979 Brigitha ta biba na Almere i den añanan ’70 a gana 21 título hulandes, ademas e ta e promé hende muhé landadó di koló ku a gana medaya olímpiko. Riba medionan sosial hende ta ekspresá nan indignashon ku Brigitha ta falta riba e ‘Wall of Fame’.
“Berdaderamente nan no sa ki hende i ki logro tin den nos Almere. Esta un bergwensa”, Ton Theunis ta skibi. Sabien Verschuur tampoko no por bai di akuerdo ku e eskoho: “Munisipio Almere, boso kara ta na bèrgwensa!!”
‘Desapuntá si, ma mi lo no pèrdè soño pa motibu di e kos aki’
– Enith Brigitha
Brigitha mes ‘tambe ta desapuntá’: “Mi ta haña lástima pero si munisipio Almere haña ku mi no ta pas aden, ya, ta ken mi ta pa mi bai bisa algu di esaki? Mi lo no pèrdè soño si pa motibu di e kos aki.”
E landadó kampion di ántes for di yüni di 2015 ta para si den International Swimming Hall of Fame (ISHOF) na e estado merikano Florida. “Ei si nan konosé mi i esei pa mi ta sufisiente rekonosementu.”
Munisipio Almere ta bisa ku `niun ora so no a lubidá nada’: “Kisas tin nòmber ku nos a keda sin mira, pero ta un muraya dinámiko ku espasio pa agregá i e tempu binidero nos ta bai mira ken mas ta kualifiká”, un bosero ta bisa.
Kiko Enith Brigitha ta hasi awendia?
|
Kiko Enith Brigitha ta hasi awendia?
Awendia Enith Brigitha ta duna lès na hóben i bieu den e pisina Duranbad na Diemen. Banda di esaki e ta empeña tambe pa desaroyá talento di natashon na su isla natal Kòrsou. Na 2017 Ret Karibense a papia ku Brigitha tokante di esaki.
E selekshon di deportista kumbre ku aktualmente ta lusi riba e muraya parti pafó di e Topsporthal na Almere ta munisipio di Almere mes a hasié. “Nos a mira esnan nominá pa e gala deportivo anual di SBS na Almere i ken tabata kampion oropeo, mundial òf olímpiko.”
‘Nos tabata sa di e kos aki, pero no tabatin tempu mas pa kore trata esaki lihé lihé’
– Munisipio Almere
Dos siman promé ku a desvelá e Wall of Fame un habitante a mustra munisipio riba e falta di e landadó kumbre di ántes Brigitha riba e lista. Per e ora ei tabata ‘muchu lat kaba’. “Nos tabata ta sa di e kos aki, pero no tabatin tempu mas pa kore trata esaki lihé lihé. Nos a bai ku loke nos tabatin kaba.”
‘Ku lo bini mas deportista kumbre na Almere riba Wall of Fame ta sigur’, pero ki dia ‘munisipio no por bisa ainda’. Ora puntra Brigitha ku e lo ta dispuesto si munisipio aserk’é awor si, e ta kontestá: “Lo mi mester pensa esaki un ratu ainda.”