WILLEMSTAD – Pareha di mésun sekso na Kòrsou ainda ta haña nan ku un inhustisia grandi; nan no tin derechi riba penshun di partner, kompensashon di viuda, seguro huntu òf rekonosementu di yu. Ounke ta manera e tabú ta birando ménos grandi, asina Carrie Hahury i Geertje Hahury-Van der Meer ku tin diesun aña kasá tambe ta bisa.
Dia Carrie i Geertje a bini Kòrsou nan ker a inskribí nan matrimonio na kranshi. “Tur hende ku nos a papia kuné ei a reakshoná masha positivo ku nos ta kasá. Solamente no tabata posibel pa registrá nos matrimonio. Pa motibu di esaki aktualmente nos ta topa ku problema. Manera no por sigurá bo partner outomátikamente na SVB. I si algu pasa un di nos, e otro no tin derechi riba nada”, Geertje ta konta.
‘E yu tambe ta hopi perhudiká- Maartje kasá ku Laura kende ta na estado
Maartje kasá ku Laura tambe ta biba huntu na Kòrsou. Laura ta na estado i ta serka di duna lus. “Esaki mayoria bia ta e momentu ku bo ta biba p’e komo mayor nobo, i ku bo ke gosa i dje, e delaster dianan”, Laura ta konta. Pero Maartje ku Laura no ta logra esaki. Nan ta pasando e último lunanan ku abogado i prosedura kompliká i ta haña hopi strès di esaki.
Pasobra despues ku Laura duna lus, Maartje no por rekonosé e yu, loke ke men ku e no tin outoridat riba e yu. “Na Kòrsou no ta posibel pa pareha gay rekonosé e yu si bo no ta e mayor biológiko. Esei ta pone ku bo ta topa ku diferente kos. Pasobra si algu pasa Laura mi no tin niun derechi. Mi no ta outorisá tampoko pa tuma desishon.”
“E kos no ta klòp tampoko pa e yu: E tin derechi riba dos mayor ku derechi i deber. Ke men e yu tambe ta hopi perhudiká”, segun Maartje.
Lei pa matrimonio di homo
Abogado David Wever ta empeñá pa derechi igual pa pareha di mésun sekso. E ta bisa ku Kòrsou por skohe: habri e posibilidat di matrimonio homo òf ofresé un alternativo igual. E delaster aki ta partner registrá.
Wever ta forma parti di Igualdat Kòrsou E movementu aki ke bini e aña aki mes ku e proposishon pa lei pa e matrimonio di homo. E ta enfatisá tambe e importansha di rekonosementu di e relashon di pareha di mésun sekso.
“Areglo di penshun i seguro pa viuda aki mayoria parti ta pa pareha, i asina partner di mésun sekso no por apliká pa nan. I kiko bo ta pensa di derechi di bishita na hòspital si un di e partnernan bira malu? Pasobra no tin un relashon di famia hurídiko, hòspital por nenga e partner pa drenta.”