DEN HAAG – Konseho di minister di Reino a disidí pa aun duna Kòrsou un asina yamá “instrukshon”. Ku esaki Den Haag por fòrsa promé minister Eugene Rhuggenaath pa ekonomisá.
Ku esaki Den Haag aun ta sigui e konseho ku Kolegio di supervishon finansiero (Cft, College financieel toezicht) a duna na aprel. Kòrsou tin añanan kaba ta lucha pa drecha e presupuesto. E ekonomia di e isla ta den un dep, tambe pa motibu di e konsekuenshanan di e krísis venesolano.
Pa yuda saka e isla for di e krísis finansiero i ekonómiko, Hulanda a traha un plan huntu ku Kòrsou. E meta ta pa stimulá ekonomia tambe. Solamente duna un instrukshon “no ta solushoná e problemanan”, sekretario di estado Raymond Knops (Relashonnan den Reino) ta bisa.
Kiko esaki ke men pa e yu di Kòrsou?
Banda di stimulashon di ekonomia i e drechamentu di e finansia di gobièrnu, e yu di Kòrsou lo ripará mihó servisio serka e diferente instanshanan di gobièrnu, minister plenipotensiario Anthony Begina ta bisa. “Si ta bon, e yu di Kòrsou entre awor i aki dos aña mester ripará ku algu a sosodé berdaderamente.”
Lo bini ayudo tambe pa pèrkurá pa tin mas plaka den kaha di gobièrnu. “Hulanda lo yuda establesé un kompania di propiedat inmóbil, kaminda nos por atministrá nos saldonan di tereno i propiedat inmóbil na drechi”, segun Begina.
Tambe lo mira seguridat sosial, kuido, enseñansa i merkado di labor. E último ta masha nesesario, pasobra desempleo na e isla ta oumentá masha lihé. Desempleo na 2018 ainda tabata 13.4 porshento i e aña aki a subi pa 21.2 porshento.
Konfiansa òf deskonfiansa?
Sekretario Knops ta nenga redondamente ku ta pa motibu di deskonfiansa e isla aun a haña un instrukshon, no opstante e akuerdo ku Hulanda.
Meskos ku promé minister Rutte, sekretario di estado Knops ta papia di “un relashon eksepshonalmente bon ku gobièrnu di Kòrsou” i di ‘konfiansa den gobièrnu Rhuggenaath.” “Na mes momentu nos tin e Lei di Reino di supervishon finansiero i nos mester manehá e lei”, segun Knops.
Kòrsou ta bai wes
Gobièrnu d Kòrsou no ta haña hustu ku a kai un instrukshon, pasobra e krísis ekonómiko na e pais bisiña Venezuela tambe tin un impakto finansiero na e isla.
Segun Begina p’esei e isla lo kuminsá un prosedura kontra e desishon. Esaki ta posibel via un asina yamá ‘Kroonberoep’ serka Konseho di Estado, e wes di gobernashon di mas haltu den Reino.