DEN HAAG – Kòrsou lo apelá e asina yamá ‘instrukshon” for di Den Haag, ku ta fòrsa e isla pa ekonomisá hopi. Esaki e representante di gobièrnu Anthony Begina a partisipá despues ku Konseho di Minister di Reino a kaba.
Segun Begina e desishon no ta hustu pa motibu di e impakto di e krísis venesolano riba e sektor turístiko i komersial na e isla. E Kolegio di supervishon finansiero(Cft) segun gobièrnu di Kòrsou no a tene kuenta sufisientemente ku e impakto di e krísis venesolano.
E echo ku aun sekretario di estado Knops ta sigui e konseho di Cft, Begina ta haña ‘lástima’, pasobra riba e mésun dia a firma un akuerdo entre Hulanda I Kòrsou pa drecha e ekonomia i e presupuesto. “Nos ta haña ku e kos por a bai diferente, sin un instrukshon”, Begina ta bisa. “Nos a ekspresá esaki tambe.”
“Mirando e situashon ekonómiko ku nos ta aden aktualmente, ku nos problemanan relashoná na Venezuela, nos ta haña ku nos por a regla e asuntu ku un akuerdo mutuo.”
‘Mira seriamente’
Gobièrnu di Kòrsou anteriormente kaba serka Konseho di Minister di Reino a yega di apelá na un regla di eksepshon ku tin pará den e Lei Supervishon Finansiero, pero sin éksito.
“Nos ke wak esaki seriamente”, Knops a bisa un luna pasá. Pa e motibu aki e tempu ei ainda a posponé e instrukshon.
Gabinete hulandes ta rekonosé e impakto di e krísis venesolano, pero esaki parse no ta sufisiente pa pone e konseho di Cft un banda. “Mester tin bon motibu pa desviá di esaki, tambe ku bista riba posibel efekto di presedente”, Knops ta bisa awe tokante e desishon di Konseho di Minister di Reino.