WILLEMSTAD – Hòspital Sint Elisabeth (Sehos) por lo pronto ta operá kaso di emergensia so. E hòspital kurasoleño no tin basta sèn pa otro operashon i pashènt awor mester warda mas largu.
Pashènt ku e medida aki a toka, ta tende na telefon ku nan operashon no ta sigui. E hòspital no ta duna klaridat kon largu e situashon aki lo keda asina. Sehos a tuma e medida pasobra no tin sèn pa remedi i material pa por hasi tur operashon.
Direktor di hòspital Anthon Casperson ta konta: “Sehos tin mas o ménos 6800 operashon den un promedio di 300 dia pa aña. Esaki ta sali riba un promedio di 22 pa 23 pashènt pa dia. E parti mas grandi di esaki ta trata operashon agudo i onkológiko. Esakinan ta 15 pa 16 operashon pa dia. Ke men sobrá ta operashon elektivo, ku no ta urgente.”
Aktualmente a posponé entre 40 pa 50 operashon ‘elektivo’ . E hòspital ta trata di atendé ku e lista di espera mas lihé posibel, direktor médiko Franke Scheper ta bisa, ehekutando operashonnan èkstra riba sierto dia. Pero e ta bisa ku esaki no ta un ‘situashon deseabel’ pasobra ku esaki ta subi e preshon di trabou serka e spesialistanan.
Kaso de korte kontra gobièrnu pa motibu di e bùdjèt muchu chikí
Un motibu ku e hòspital ta duna pa su situashon finansiero malu ta e bùdjèt muchu chikí ku e hòspital mester sali kuné kuater aña kaba. Esaki tambe ta oumentá e défisitnan: na 2016 i 2017 esaki tabata 14.4 mion florin. I na 2018 i 2019 esaki ta 3.4 mion. Na 2018 gobièrnu a subi e bùdjèt pa kuido. Pero segun e hòspital te ainda esaki no ta sufisiente pa kubri e gastunan.
Minister di Salubridat Suzy Camelia-Römer no ta di akuerdo ku e hòspital no ta haña sufisiente bùdjèt: “Na 2018 i 2019 Sehos a haña un oumento di 124 pa 135 mion. Ademas nan ta sinta na mesa ku e inspektor di salubridat públiko pa asina nos por haña un bista riba nan gastunan.”
Entretantu e hòspital a bai wes pa motibu di malkontentu ku e bùdjèt muchu abou. “Si un partido tin opheshon, semper nan por ekspresá esaki, esaki hòspital tambe a hasi awor”, e minister ku promé ke warda e investigashon di su inspekshon di salubridat públiko ta haña. Entretantu e hòspital a haña 2.1 mion di gobièrnu si, pero e ta bisa ku esaki no ta sufisiente pa kuminsá atrobe ku e skema di operashon.
Trato di e kaso mester tuma lugá ainda. Ainda no tin un fecha.