DEN HAAG – Tantu na Kòrsou komo den polítika di Den Haag a surgi konmoshon tokante mandatario polítiko na e isla ku riba kuenta di e pagadó di belásten ta gana sentenáres di míles di florin. Segun promé minister Eugène Rhuggenaath esaki lo para mas pronto posibel.
Den medionan sosial tin dokumentu ku a lèk, kaminda por mira ku e diferente mandatarionan públiko na Kòrsou ta gana entre di 700.000 i 1.1 mion florin i ku un direktor ku tin un outo na su disposishon ku ta bal un mion florin.
John Samson den kombersashon ku Ronald van Raak (SP) (Na Hulandes)
Den polítika na Den Haag tambe tin indignashon tokante e ‘entradanan kumbre eksorbitante aki’. E parlamentario di SP Ronald van Raak ke aklarashon i a hasi pregunta por eskrito na sekretario di estado Raymond Knops (Relashonnan den Reino).
E diskushon tokante entradanan kumbre ta yega na un momento polítikamente sensitivo, pasobra Den Haag a fòrsa e isla pa ekonomisá sentenáres di miónes. “Di un banda nos ta hopi severo si ta trata di e presupuesto ofishal, pero di otro banda ta masha hopi sèn ta bai pa e kompanianan di gobièrnu ei”, Van Raak ta bisa.
John Samson den kombersashon ku Promé minister Rhuggenaath (Na Hulandes)
Promé minister Rhuggenaath ta laga sa ku durante di e temporada di gabinete aki lo bini ku medida. Den futuro no ta pèrmití mandatario serka kompanianan di gobièrnu i fundashonnan di gana mas ku 130 porshento mas ku un minister. “Esaki ta komparabel ku e asina yamá norma di Balkenende.”
A lèk for di servisio di belásten di Kòrsou?
Promé minister Eugène Rhuggenaath di Kòrsou ta yama e posibel lèk ‘preokupante’ i ta bisa ku e lo laga investigá inmediatamente si e dokumentunan ta outéntiko. “Nos ta spera ku esaki no ta e kaso”, e promé minister, ku ta teme ku den e kaso aki e privasidat di siudadano ta na peliger na servisio di belásten, ta bisa.
“E ora ei nos ta haña nos ku un situashon serio, kaminda no por konfia ku informashon personal òf informashon fiskal ta haña trato konfidensial serka servisio di belásten.”
Promé minister Rhuggenaath: un situashon serio (Na Hulandes)
Promé minister Rhuggenaath ta primintí ku lo bini mas transparensia ora ta trata di plaka públiko. Gabinete lo investigá den ki medida e entradanan kumbre i e gastunan na e kompanianan di gobièrnu i e fundashonnan lo bira públiko.
Tambe ta e intenshon ku lo bini supervishon independiente riba tur kompania di gobièrnu i fundashon. Un instansha asina mester kontrolá e entradanan i pèrkurá pa manehá plaka públiko bon. “Esaki aktualmente no ta bon organisá ainda”, Rhuggenaath ta bisa.