WILLEMSTAD – Èks minister George Jamaloodin djabièrnè atardi a haña 28 aña di kastigu den sèl pa dunamentu di e òrden pa – i e pagamentu di e asesinato polítiko riba Helmin Wiels na aña 2013. Ounke wes no a konsiderá vários deklarashon di testigu komo usabel, segun wes tin prueba si ku ta Jamaloodin a provoká e asesinato. Ministerio Públiko a eksihí 30 aña den sèl.
Helmin Wiels -potret: Jamila Baaziz
E ruman muhénan di e èks minister for di tribuna a reakshoná emoshoná riba e sentensia: ‘Korupto! Mentita tur! No tin prueba!’ por a tende. Jamaloodin a sali sala di korte visiblemente emoshoná. Na e otro banda e famianan di Wiels tabata sinta, nan a keda ketu. Pa nan tampoko e kaso no a kaba. “Esaki no tabata algu di un persona. Esakinan tabata mas persona. Nan ta kana liber ainda”, Aubert Wiels, e ruman hòmber di Helmin ta bisa.
Polítiko popular
E asesinato riba e polítiko popular Helmin Wiels riba 5 di mei 2013 a trese un shòk grandi na Kòrsou. Tabata e promé asesinato polítiko riba e isla. Wiels tabata e fundadó i lider di e partido Pueblo Soberano i tabata boga pa un Kòrsou independiente. Tambe e ker a dil ku korupshon riba e isla.
Asina Wiels tabata sospechá e doño di loteria poderoso Robbie dos Santos – ruman di Jamaloodin – di práktikanan di wega di plaka ilegal i promé ku su morto el a primintí di publiká un fail tokante esaki. Ainda ta konsiderá Dos Santos un sospechoso.
Malversashon di sèn di supsidio
Tambe a kondená Jamaloodin pa e kaso di froude Germanium, pa hòrtamentu di sèn di supsidio pa un kancha di deporte. E èks minister durante e trato riba kontenido di e kaso na yüni a atmití esaki. Su atmishon no a trese ménos kastigu, pasobra wes ta haña ku por lo demas Jamaloodin no tabata duna kontesta kla pakiko el a hòrta e sèn.
George Jamaloodin – potret: Anneke Polak
No a prueba areglo faborabel pa ruman hòmber
Den un otro kaso di froude kaminda Jamaloodin mester a parse dilanti di wes, e kaso Passaat, a sak’é liber pa motibu di prueba insufisiente. E kaso aki tabata trata di skibimentu di un fecha mas trempan ku e fecha aktual di un areglo fiskal di 2011 tempu ku Jamaloodin tabata minister. Asina por a paga miónes na belásten evadí ku a deskubrí na un manera faborabel. Segun OM esaki tabata bentahoso pa Jamaloodin su ruman Robbie dos Santos.