WILLEMSTAD – E hòspital kurasoleño Sehos tin un debe di sigur 127 mion florin i téknikamente ta fayit. Entretantu a konstruí un hòspital nobo ku komo fundashon nobo mester bira blachi kuminsá di nobo. Kiko esaki ke men pa Sehos si nan no ta funshoná mas komo hòspital?
Iglesia katóliko a lanta Fundashon Sehos na 1855. Awor, 164 aña despues, ainda esaki ta e hòspital di mas grandi di Kòrsou. E hòspital nobo, ku lo bai yama Curaçao Medical Centre, mester habri e aña aki mes, pero pareu ku esaki e problemanan di Sehos ta oumentando, espesialmente pa falta di sèn. E pregunta ta ken na final lo paga e debenan.
‘Gobièrnu no ta manehá hòspital’
“Gobièrnu sigur ku nò”, Clifton Walle, bosero rònt di e transishon i e Hòspital Nobo Otrobanda (HNO), ta bisa. “E hòspital no ta di nan. Nunka gobièrnu no a manehá un hòspital.” Sí gobièrnu tin e responsabilidat pa ‘tuma medidanan pa promové salubridat públiko’, asina Artikulo 25 ta bisa.
Esaki ta enserá ku e kuido mester ta disponibel pa e siudadano. Esaki por nifiká tambe ku ta manda e siudadano afó pa mira dòkter”, Walle ta splika. “Kontal ku e siudadano por disponé di kuido.”
‘Fundashon Sehos lo a eksplotá e hòspital nobo’
Den e ‘Memorandum of Understanding’ (MoU) entre Sehos i gobièrnu a palabrá ku ‘Sehos na fin di e temporada di transishon lo fungi komo e entidat di eksplotashon’: ke men Fundashon Sehos lo a pasa pa e hòspital nobo. Despues a disidí di lanta un entidat nobo pa e hòspital nobo. Esaki ta HNO, un fundashon ku gobièrnu a lanta ‘di un distansha’.
Elvis Thodé, direktor finansiero di Sehos ta bisa ku gobièrnu aña pasá a disidí di no kumpli ku e punto aki di e MoU. “Ku esaki a kita e posibilidat di paga debe poko poko via e e eksplotashon di hòspital Sehos (den HNO).”
Thode ta bisa ku un gran parti di e debe mester amortisá ku kanselashon di e debe na gobièrnu; ku benta di aparato; material i otro kos ku e hòspital nobo mester di dje. “Segun nos kuenta esaki ta sufisiente”, Thode ta bisa.
Tambe tin un plan di destinashon pa e propiedat inmóbil di Fundashon Sehos. “Despues di restorashon e edifisio por sirbi komo hotèl di kuido, Boutique Hotel, kas di biba, hóreka i ofisina.” Pa e plannan aki mester di 50 pa 60 mion sí, pero Thodé ta mira esaki positivamente: “Mas desaroyo i empleo na Otrobanda en bes di edifisio dekaí. E eskoho aki no ta parse mi difísil.”
Gobièrnu i direktiva di Sehos ta den deliberashon tokante di debe. Si na final Sehos bai fayit tòg, lo mira si tin un hende solidariamente responsabel i si tin kuestion di málmaneho. Si esaki ta e kaso, por pone un hende responsabel pa e pèrdida.