WILLEMSTAD – Dùrwarder ku ta pidi suma mensual irasonabel pa paga debe. Ta un keho ku ta tende hopi serka èks studiante, ku ta haña nan fòrsá di paga nan debe na Dienst Uitvoering Onderwijs (DUO, Servisio Ehekushon di Enseñansa) via dùrwarder lokal na Kòrsou. Pa falta di legislashon e èks studiantenan no por duna keho lokalmente.
Segun e abogado Achim Henriquez for di e transishon di Antia Hulandes pa Kòrsou komo pais outónomo riba 10-10-2010 a entamá diferente kaso kontra dùrwarder. Korte Komun no por a trata e kasonan pasobra for di 2010 no tin u kuadro legal hurídiko ku ta regulá e trabounan di un dùrwarder.
Aktualmente e èks studiantenan aki i tur otro hende ku pa motibu di debe tin di hasi ku dùrwarder, hurídikamente no tin niun sosten. “No tin un lei ku ta kontrolá e trabou di e dùrwardernan”, parlamentario Ana-Maria Pauletta (PAR) ta konta. “Esaki ta e legislashon ku nos ke pasa den parlamento. Den nos komunidat di awe no por ta asina ku henter un ramo asina no ta regulá. Esei ta e base di e lei.”
“Esaki ta un asuntu malu ku tur konsekuensha di esaki”, Pauletta ta bisa. “A skòrs algun dùrwarder, pero e hendenan aki ta traha ketu bai. Pasobra no tin niun punto di referensia, niun hende no por hasi nada na esaki.” Segun e parlamentario tin èks studiante ku a entregá keho kontra dùrwarder. Wes no por tuma e kasonan aki pa trata.
“Nos ta papia aki di dùrwarder di ken e sédula a vense. Den lei tin pará ku dùrwarder mester por legitimá nan mes. Si e sédula vense, bon mirá bo no por funshoná mas komo dùrwarder. Pero nan no por prolong’é niun kaminda”, segun Pauletta. “E pregunta ta si e dùrwardernan sin kuadro hurídiko por pone beslag riba kos.”
Situashon inakseptabel
Segun Matthijs van der Gullick, general-manager di Ofisina di Dùrwarder na Kòrsou e falta di legislashon te awe no a trese problema. “Den práktika tur kos ta sigui kore, pero no tin posibilidat di keha. Ku no tin legislashon ta un situashon kompletamente inakseptabel. Na 2013 Korte Komun a dikta sentensia, dirigí na e stipuladónan di maneho, ku mester bini legislashon. Esaki tabata seis aña pasá kaba”, segun Van der Gullick.
E ta no rekonosé e relato di e èks studiantenan. Segun e, e èks studiantenan por keha si tokante e pagonan na ofisina di dùrwarder mes, pero kasi nunka esaki no ta sosodé. Riba e pregunta ku ta e ofisina di dùrwarder mes mester investigá su mes Van der Gullick ta bisa: “semper nos ta trata di yega na un solushon.”