WILLEMSTAD – “Nos terasa i nos restorant a sera. Nos tin solamente take out. Asina en todo kaso nos por tene poko trahadó na trabou”, Thijs de Bruin, ko-doño di e popular Café De Buren na Wilhelminaplein ta bisa.
De Buren ta un di e lugánan di hóreka ku pa motibu di e medidanan di gobièrnu di Kòrsou kontra plamamentu di e viro corona a hañ’e ta sera e parti di restorant. “Kon largu nos por keda asina sin yudansa di gobièrnu no ta kla pa nos,”
E efektonan di e medidanan ta riparabel kaba. Corinda de Mooij por konta di esaki. E ta traha komo instruktor di sambuyamentu na Scuba Lodge. No ta sigur si lo prolongá si kòntrakt. “No ta masha kla. Mi tin un kòntrakt te 11 di aprel i despues probablemente nan no por prolongá.”
Pasobra sin trabou ke men sin entrada, e ta trata di bai Hulanda bèk, pero esaki no por pasobra e ta siudadano di Kòrsou. Pasobra a sera fronteranan pa habitantenan di Kòrsou, e no tin otro eskoho ku warda e krísis na e isla, sin trabou, entrada i sin bista riba un trabou nobo.
Un Handelskade bandoná Potrèt: Kim Hendrikse
Handelskade kaminda normalmente tin hopi turista, ta kasi morto. Restorantnan a sera, djis un solo lugá manera De Buren ta habrí pa take out. Mayoria di doño di pakus pa prekoushon pa seguridat di kliente i trahadó tambe a sera nan lugá.
“Ainda nos no por midi e efekto”, Carine Ghazzi, direktor di e asosiashon di negoshante Downtown Mangement Organization (MO) na Punda ta konta. Pero ku esaki lo tin impakto grandi riba e negoshantenan lokal si ta kla, segun e.
“E konsekuensha di mas doloroso lo ta e efekto di e pèrdida di e trabounan. Pa motibu di e insiguridat di e durashon di e situashon aki, ta masha difísil pa bisa algu tokante di esaki”, segun Ghazzi.
E empresarionan ta kontentu ku e inisiativanan ku e bankonan a instalá rápidamente pa kita e doló di e empresarionan. E siman aki diferente banko, entre nan Maduro & Curiel’s Bank (MCB), Orco Bank i Banco di Caribe a laga sa ku nan ta duna nan klientenan e posibilidat di posponé e pagonan di nan fiansanan personal i hipoteknan pa un máksimo di tres luna.
Pa hende ku un kas di hür ku pa motibu di e krísis no por paga e hür mas, doño na MCB Michael de Sola a indiká ku e hendenan aki por entregá un petishon pa debe èkstra. Di e manera aki MCB ta trata di yuda su klientenan.
Gobièrnu a indiká ku djaluna awó nan lo presentá un pakete pa stimulá ekonomia i pa suavisá e medidanan kontra corona.