DEN HAAG – Minister Knops (Relashonnan den Reino) huntu ku Aruba, Kòrsou i Sint Maarten ke mira kon por yuda e islanan finansieramente. E islanan tambe ta haña sla ekonómiko di e krísis di corona.
E munisipionan karibense Boneiru, Saba i Sint Eustatius por konta ku un pakete di sosten ekonómiko for di Den Haag. Hende i kompania ku ta pèrdè entrada pa motibu di corona ta haña un kompensashon.
Esaki no ta konta pa Aruba, Kòrsou i Sint Maarten, pasobra nan ta pais outónomo den Reino
Mas espasio finansiero pa Aruba, Kòrsou, Sint Maarten
E islanan outónomo anteriormente a haña e órden for di Den Haag pa ekonomisá hopi. Minister Raymond Knops ta rekonosé ku asina e islanan a haña nan ku ‘limitashon di bùdjèt’ den e krísis aki i ta awor investigá e posibilidatnan.
Tambe e ekonomia di e islanan aki ta dependé hopi di turismo. Ku e krísis di e viro nobo di corona espesialmente e sektor aki lo sufri sla duru.
“Den e sirkunstanshanan masha ekstraordinario ku tin awor, ta mira si a base di e posibilidatnan ku e Statüt di Reino ta duna i e eksepshonnan den lei i regla, si por fasilitá e islanan pa wanta e krísis mas mihó posibel”, segun e minister
Kòrsou: ‘Nos mester di sosten’
“Nos mester di sosten finansiero”, e presidente di parlamento William Millerson (PAR) ta bisa. “Aktualmente ta difísil pa nos duna e sosten nesesario, mirando nos situashon finansiero i ekonómiko prekario.”Tambe Banko Sentral di Kòrsou i Sint Maarten (CBCS) ta hasi un apelashon na Hulanda pa sosten finansiero. E ta avisá pa ‘retiro masal’ si no bini fiansa di emergensia, pasobra e islanan no tin espasio pa wanta sla manera Hulanda.
“Espesialmente den e tempunan aki e paisnan den Reino mester duna otro ayudo i sosten. Solidaridat aktualmente ta mas importante ku nunka”, segun direktor interino Jose Jardim (CBCS). “Kòrsou i Sint Maarten ta pará dilanti di un reto pisá.”
“E retonan di e temporada ku ta bini sin duda lo pone un preshon enorme riba e gobièrnunan di tur dos pais. CBCS p’esei lo hasi su máksimo esfuerso pa yuda e gobièrnunan di Kòrsou i Sint Maarten.”
‘Konseho di minister di Reino mas lihé prosibel’
E Kolegio di supervihon finansiero, ku ta supervisá e finansanan di e islanan, i Fondo Internashonal Monetario ta registrá kiko e islanan mester.
Pronto lo bini un Konseho di Minister na Den Haag kaminda lo tuma e desishonnan pa e islanan outónomo. E ministerio no por duna un fecha eksakto. “Mas lihé posibel.”
Segun un bosero esaki por ta otro siman kaba, pero esei ta keda ‘dependé di e tèmpo’ den kua e diferente instanshanan finansiero por yega na konseho.