KRALENDIJK – Den un grupo di Facebook spesial yamá Corona Help Bonaire (Corona Yuda Boneiru, trad.) ku mas di tres mil miembro, banda di vidio i update di e último desaroyonan hopi hende tabata publiká notisia kaminda nan tabata pidi otro hende pa ayudo òf nan mes tabata ofresé esaki. Ret Karibense a bishitá algun inisiativa.
Empresarionan Jan i Marianne van der Meulen, doñonan di un kompania di hür outo, a mira nan trabounan para pa motibu di e krísis di Corona. Na mes no ta keda sinta ketu. “Nos a disidí pa den e tempunan straño aki nos duna sosten”, Marianne ta konta.
Outor: Marit Severijnse [NA HULANDES]
E pareha ta pone outo di hür disponibel grátis na dos organisashon di ayudo ku tur dos ta usa esaki pa un bon meta. “Mester tabata un organisashon di boluntario rekonosé ku ta duna ayudo grátis na hende pober, den nesesidat, òf hende ku di un otro manera no por bai niun paso dilanti.”
Entregá kuminda na skol
E promé outo a resultá na Fundashon Kuminda pa Skol. E organisashon a mira un problema surgi ora skolnan mester a sera pa motibu di e vírùs Corona. Di repente nan no por a pèrkurá mas pa pan pa kasi 800 mucha ku anteriormente tabata haña esaki tur dia.
“Ora e notisia a bira ofishal, e realisashon a drenta”, Elizé Martis Craane, kordinadó na e fundashon ta konta. “Mi tabata mira mi mes yunan sinta na kas i mi a kuminsá preokupá: kiko si e otro muchanan ei awor apénas tin algu di kome na kas?”
Aktualmente gobièrnu ta trahando riba un plan pa duna mas famia den nesesidat kuminda. Pero segun Elizé esaki ta dura muchu largu. “Únabes gobièrnu bini ku e medida ei nos lo sigui ku nan, pero entretantu nos ke yuda awor kaminda ta posibel.”
P’esei e fundashon a disidí di traha pakete di siman i entregá esakinan personalmente seka e muchanan na kas. Pa realisá esaki nan a pone un yamada riba Facebook kaminda nan a pidi hende yuda nan. A drenta hopi donashon i pa kasualidat Elizé a mira e notisia di Jan i Marianne. Awor ta usa e outo pa parti e paketenan. “Mi mes outo ta muchu chikí p’esaki.”
Kuminda, wega di mucha i remedi pa esnan grandi di edat
Fundashon Cocari Rincon a buska e di dos outo djaweps. E akohida di den dia kaminda diariamente tabatin 65 hende grandi di edat ta bini huntu, siman pasá a sera pa motibu di prekoushon.
“E riesgo tabata muchu grandi. Nos tin tres sala kaminda normalmente binti hende ta sinta huntu”, direktor Boy Clarenda ta konta. P’esei awor tur dia nan ta hiba e kumindanan di dia na kas seka e hendenan, meskos ku nan remedinan i un buki di pùzel i charada.
Dos shafùr kada un ta kore nan mes ruta. Ántes tabata nan tarea pa meinta buska e grandinan ku no por kana bon i hiba nan kas bèk despues di e akohida. Shafùr Julius Clarenda ta komprondé ku aktualmente no tin mod’e hasi, pero e ta haña ku ta difísil si.
“Mi sa ku e grandinan gusta pasa dia na Cocari. Normalmente nan ta seka nos di ocho pa sinku i awor nan mester keda kas. Mayoria di nan ta kompletamente nan so.” E organisashon ta hasi tur loke ta posibel pa pasa ku mas kompañadó. “Pa asina nan por papia ku tur hende un ratu.”
E krísis ta èkstra duru pa motibu di pobresa
Un grupo di sinku amigu huntu a haña e idea pa tur siman hasi un kuminda grátis pa habitante lokal. Djabièrnè nan a hasi esaki pa promé bia na e parada di outo dilanti’ Yummy Yummy Bar.
“Naturalmente tin hopi pobresa na e isla, pero e situashon rònt di e vírùs Corona ta kai manera un sla di bos”, Irma Trumpie Luijten ta konta.
Riba nan yamada riba Facebook nan a haña hopi reakshon positivo i bintisinku reservashon. Hende por a bin buska e kuminda kayente, òf laga tres’é na kas. Di empresario lokal nan a haña ingrediente èkstra.
Aktitut vulnerabel
Irma Trumpie-Luijten ta spera ku e hendenan lo no tin miedu di aserká su tim. “Nos ta komprondé ku e kaminda pa yega no ta fásil, pero nos ta spera ku hende por hèndel esaki. Un kuminda nutritivo ta asina importante.”