DEN HAAG – Un tempu Gilberto Morishaw tabata den un ‘dep’. Ku e medidanan di corona su trabou nobo no ta sigui. I e no por kaba su tésis. E ora ei el a disidí di hinka su energia den konekshon i sosten pa e komunidat karibense ku e plataforma Keda Kas.

E idea ta pa uni aktividat nobo i eksistente digital den e komunidat karibense na Hulanda i na e islanan. “Awor tur kos ta plamá i tur hende literalmente ta sintá riba nan mes isla” Morishaw ta bisa. Keda Kas ta organisá diskushon digital i seshon di mental health. Pero tambe ta kompartí vlog di influencers karibense ku tep pa keda kas.

Zu-edy di Kòrsou a haña corona i ta kompartí kon tabata pa ta na Hulanda, leu di famia. Still for di vidio.

Leu di famia
Na e islanan ultramar tin un lockdown na vigor. Esaki ke men ku habitantenan por sali solamente den kaso di emergensia i pa hasi kompra òf buska remedi. Na Hulanda tambe a prolongá e medidanan di corona. Pa hopi hulandes karibense esaki ke men ku nan famia i amigunan ta leu, plamá rònt Reino.

P’esei Morishaw ke duna atenshon na e salubridat síkiko i emoshonal. “Nos no ta tene kombersashon profundo ku otro dje fásil ei. Nos tin miedu, esei ami semper a haña. Pero tin un shift bou di e generashon hóben.”

Ku Keda Kas e siman binidero e ta organisá un Mental Health Session. “Nos ta den kombersashon ku studiante di sikologia i nos ke invitá tur hende pa wak live i hasi nan preguntanan. Asina nos por krea un lugá kaminda nos por kompartí tur kos ku otro.”

Influencer karibense Giomy ta kompartí tep pa hasi bida agradabel durante karentena. Still for di vidio.

Morishaw ke papia espesialmente di un mihó perspektiva di futuro pa e islanan, i e ora ei espesialmente ku young professionals karibense. Keda Kas a tene un konferensha online kaba na Kòrsou tokante kon keda traha durante i despues di e krísis di corona.

Perspektiva nobo
“Awor ta e momentu pa huntu brainstorm tokante un perspektiva pa un mundu ku corona” Morishaw ta bisa. “E islanan tabata pasa hopi trabou kaba ku ekonomia; nos mester bai pa un ekonomia duradero i fleksibel. Un ku no ta dependiente di turismo i zeta. Nos tur mester pensa tokante di esaki. Awor ta e momentu.”