WILLEMSTAD – E islanan ABC i BES ta haña 16,6 mion euro di ayudo di emergensia. Kon ta bai parti e sèn aki den e seis islanan ainda no ta konosí.
E ayudo mester bai pa e siudadanonan ku sufri mas tantu di e krísis di corona. Asina sekretario di estado Raymond Knops a bisa awe. Ta pa pakete di kuminda i produkto di higiena personal, el a bisa.
No ta pa sosten di presupuesto
Gobièrnunan di e islanan no por usa e suma aki pa kompletá e défisitnan den nan presupuesto. Pasobra p’esei Knops ta enfatisá atrobe, mester mira promé ki medida di ekonomisashon e islanan mes ta tuma.
“Awor ku no tin entrada ta drenta mas for di turismo, e paisnan mester bini ku un plan kon nan lo bai kompensá e pèrdida di entrada aki. Esaki ta enserá ku mester ekonomisá na e banda di gastu.”
Komplimentá Aruba
Anteriormente kaba Hulanda a laga sa ku mester trata espesialmente e salarionan haltu di polítiko, ámtenarnan kumbre i direktor di kompania di gobièrnu. Ta un di e kondishonnan pa espesialmente e paisnan outónomo Aruba, Kòrsou i Sint-Maarten pa haña sosten pa presupuesto.
Awe Knops a komplimentá Aruba ku ya kaba ta tuma medida p’esaki ku e norma Wever-Croes (un variante di e norma di Balkenende).
Ku e norma aki direktornan no por gana mas ku 130 porshento di e salario di un minister (e salario ei ta mas o ménos 7600 euro. Pero e promé minister di Aruba ta atmití ku ainda e no por apliká e norma aki riba tur salario di direktor, pa motibu di kontrakt di labor eksistente.
Na Kòrsou a papia di e norma di Rhuggenaath. Pero ainda no a tuma e desishon.