KRALENDIJK – E echo ku e islanan karibense a duna un kontribushon importante na liberashon di Reino Hulandes den Segundo Guera Mundial no ta konosí seka tur hende. P’esei na Boneiru tur aña ta konmemorá esaki.
E Asosiashon di Veterano Boneiru pa motibu di e krísis di corona , meskos ku na Hulanda, riba 4 di mei a tene un konmemorashon adaptá. Públiko no tabata pèrmití di ta presente i a strim e momento online pa e otro veteranonan. Den un setting íntimo a tene dos minüt di silensio i tabata tin un momento pa pone un krans.
.Outor Marit Severijnse (Na Hulandes)
Kada veterano ta eksperensiá e dia aki na su mes manera. Robert Straus ku su ochenta aña ta e veterano di mas bieu di e asosiashon. Trintitres aña e tabata den servisio militar. Su pensamentunan e dianan aki ta bai pa su tata ku ta derá na un kampo di honor na Indonesia. Poko tempu ei el a bishitá esaki pa promé bia den su bida. “Nos por gradisí Dios na rudia pa 75 aña di libertat, pasobra a duna hopi pa haña esaki.”
‘Tin bia mi ta soña tambe di e tempu ku mi tabata den un kampamentu komo mucha hóben’
-Veterano Robert Straus
Veterano Joop van der Linden tambe tin 80 aña, pero e ta nèt un tiki mas jòn ku Straus. El a pensa na tur kos ku a sosodé den pasado. “Mi a nase promé ku guera, ke men mi a pasa den tur kos. Nos mester a lucha pa nos pan. E kos ta profundo den mi mente.”
Tòg tur dos e veteranonan ta atmití ku no ta riba 4 di mei so nan ta pensa riba pasado. “Henter aña mi ta haña memoria ku ta pasa. Tin bia mi ta soña di e tempu ku komo mucha hóben mi tabata den un kampamentu’, Robert Straus ta konta.
Joop van der Linden hopi bia ta pensa riba esaki algun siman promé ku e konmemorashon kaba. “E ora ei bo ta tende algu tokante e konmemorashon binidero i e ora ei e kos ta lanta atrobe. Pa mi ta manera un sine grandi i e no ta pasa awe so.”
E papel di e islanan den Segundo Guera Mundial
Durante di Segundo Guera Mundial e islanan tabat adi importansha esensial pa suministrá kombustibel pa Defensa. P’esei tabata tira riba e islanan tambe. Atakenan di torpedo for di supmarino aleman na Aruba na 1042 a destruí tènker i otro barku. Na Kòrsou a torpediá e bapor tènker Rafaëla.
Na diferente manera tabata kolekta sèn na e islanan, paña i kos pa e Hulandesnan na Europa ku tabata sufri. Asina empleadonan di Shell mensualmente tabata duna un parti di nan salario pa liberashon di Hulanda. Tambe a lanta Prins Bernhard Fonds ku kua e islanan tabata spar sèn pa arma ‘pa kore ku e enemigu for di Hulanda’.