KRALENDIJK- E medidanan pa evitá plamamentu di e vírùs di corona tin impakto serio riba ekonomia di Boneiru. Esaki ta un sla pa no solamente empresarionan. Fundashonnan i organisashonnan ‘non-profit’ tambe ta eksperensiá momentunan difísil.
Hopi fundashon tin un kontrato di kuido ku Gobièrnu i ta risibí supsidio. Ya pa vários aña ta kòrta den supsidio di fundashonnan. Lokual ta trese un buraku den e finansa di e fundashonnan. Un buraku ku den e situashon aktual ta peligrá nan eksistensia.
Skol di baile, Dance Sensation Foundation, ta un organisashon non-profit ku tambe ta pasando den momentunan difísil. Nan grupo di enfoke ta entre otro hóbennan di ménos rekurso.
.Outor Marit Severijnse
“Te ku awor nos a sobrebibí pasó nos a trata na diferente manera kreativo pa yena e buraku finansiero. Pero e situashon di vírùs di corona ta pone ku awor esaki ta kasi imposibel”, Angele Cecilia fundadó di skol di baile ta bisa.
Añanan di supsidio inkompletu
Segun Cecilia, e skol di baile tin añanan ta risibí supsidio inkompletu di gobièrnu. Esaki ta trese preokupashon finansiero kuné. Nan a papia ku diferente gobièrnu na turno pero sin resultado.
“Nos a papia ku tur e diputadonan konserní, pero sin nunka haña un kontesta kla. E diputado aktual, Nina Den Heyer a bisa ku no tin sèn. Parse ku fundashonnan no ta prioridat di gobièrnu”, Cecilia ta bisa.
Mester di prosedura transparente
“Nos no ta pidi hopi. Solamente pa kompletá e montante ku a kòrta den e supsidio. I tambe nos ke pa gobièrnu bini ku un maneho i prosedura transparente. Duna klaridat pa ki motibu ta kòrta den e supsidio”, Cecilia ta asentuá.
Pa kompletá e supsidio, e skol di baile mester di kasi nuebe mil dòler èkstra pa luna. E suma aki ta nesesario mirando ku nan entrada di kontribushon di mayornan a baha. Hopi mayor ku tabata laborá den sektor turístiko a pèrdè trabou i sin entrada nan no por kontribuí.
Gobièrnu ta hasiendo investigashon
Diputado Den Heyer ta konsiente di e situashon agudo di algun fundashon. “Den 2018 e gobièrnu anterior a kòrta den supsidio di fundashonnan. Nos ta hasiendo investigashon pa wak si mester adaptá montante di supsidio.
Awor ku ta aliviando medidanan pa ku e vírùs di corona por haña mas klaridat di e daño pa organisashonnan.
Tokante e situashon di skol di baile, diputado ta reakshoná: “ Mi no ta kere ku gobièrnu lo benefisiá si nan sera porta. Nos lo wak ki posibilidat tin.”
Plataforma NGO (organisashon ku ta sostené fundashonnan) ta na altura ku tin vários fundashon den problema. “Nos ta inventarisando e nesesidat mas grandi bou di e fundashonnan. Pa wak na ki manera por duna sosten.”