WILEMSTAD – Pobresa na Kòrsou t’asina angustioso ku Krus Kòrá na e isla ta teme pa atrako durante e dunamentu di ousilio di emergensia. Anteriormente kaba hende ku hamber a menasá e organisashon di ousilio.
Pa garantisá e seguridat di e kolaboradónan Krus Kòrá ta trese pakete di kumindá den un kolumna di vehíkulo pa e diferente puntonan di kolekshon, for di kua ta sigui parti e paketenan mas aleu riba e isla.
E pobresa na e isla for di e krísis di corona a oumentá enormemente. Míles di hende ta sin trabou, sèn i kuminda. E desesperashon segun e ousiliantenan ta palpabel espesialmente den e barionan di mas pober.
Hende hambrá ta menasá
“Den e último simannan nos a tende di diferente organisashon ku ta parti pakete di kuminda ku hende hambrá tabata menasá nan”, Charles Sintjacoba, lider hubenil junior na Krus Kòrá na Kòrsou, ta konfirmá.
Tempu ku nèt ora nos a kuminsá ta paketá e paketenan, regularmente nos tabata haña hende hambrá na porta di Krus Kòrá ta pidi kuminda. Pa protehá nos boluntarionan nos ta kore ku mas outo bai e sitionan, i nos ta trata di hasi esaki mas lihé posibel, ke men paketá, bai pa kaba.
Gruponan vulnerabel a haña sla duru
Fundashon Funditut ta komprondé e desesperashon bou di e kurasoleñonan. E organisashon ta yuda hóben vulnerabel ku un pasado den prizòn pa tuma parti na komunidat. “Normalmente e hóbennan ta traha seka nos, nan ta haña un suèldu pero for di COVID-19 nan ta sintá na kas sin entrada”, Reno Martha, lider di proyekto di Funditut, ta bisa.
“Sea nan ta muri di hamber òf nan mester hòrta nan kuminda”
– Reno Martha, guia di hóben na Funditut
.
Kada siman ta entregá pakete di kuminda na e fundashon pa e hóbennan i nan famia. “Sin e paketenan di kuminda aki e hóbennan lo no tabatin di kome e último dos lunanan aki. Nan lo a muri di hamber òf nan lo mester a hòrta nan kuminda. P’esei nos ta masha gradisidu ku nos ta haña e paketenan di kuminda aki.
16.5 mion euro di ousilio di emergensia
|
Supervishon i partishon di e ayudo di ousilio
E Representante di Hulanda na Willemstad ta supervisá pa e sèn di Hulanda haña un bon destino na Kòrsou. Pero no ta konosí kon ta parti e sèn eksaktamente riba e islanan, esaki no a stipulá delantá den porsentahe.
“Ta un asuntu di nesesidat”, Erwin Arkenbout, representante di Hulanda na Kòrsou, Aruba i Sint-Maarten ta konta. “Nos ta sigui loke Krus Kòrá proponé. Probablemente e partishon lo ta segun e grandura di e islanan pero si e problema resultá di ta mas grandi na por ehèmpel Aruba, nan lo haña mas hopi.”
Aktualmente a planeá e ayudo di emergensia te ougùstùs. Si despues resultá ku tin mester di mas ayudo di emergensia, lo mira si Hulanda lo prolongá e término.