DEN HAAG – E kantidat di infekshon di corona na Aruba i Sint Maarten ta subi hopi. Tòg segun minister Ank Bijleveld di Defensa no tin motibu pa bolbe manda e barku di marina Karel Doorman pa Karibe.
Na Aruba tin 905 hende infektá ku e vírùs. Kuminsamentu di ougùstùs ainda esaki tabata 108. Na Sint Maarten tambe e kantidat di kontaminashon aktivo a oumentá lihé pa sigur 193, di kua 10 hende ta den hòspital. Na Aruba entretantu a atmití 16 hende na hòspital.
John Samson papia ku minister Bijleveld (Defensie)
Segun e minister tin sufisiente personal di defensa presente ei ainda pa yuda e islanan. E islanan no a entregá un petishon pa ayudo. “Nos ta vigilá e situashon bon.”
D66: ‘Tòg kontemplá di manda un barku di marina’
Aruba, Kòrsou i Sint Maarten for di aprel a haña 12 aparato di respirashon èkstra via Hulanda pa por oumentá e kamanan di ic. Boneiru a haña seis kama di ic èkstra.
Bijleveld ta enfatisá ku ta na e islanan mes pa pidi sosten ofishal. Entre tantu den Tweede Kamer D66 ta pidi atenshon pa e situashon den Karibe. E miedu ta ku, mirando e kantidat di infekshon, e atmishonnan na hòspital lo oumentá den algun siman.
P’esei e partido di koalishon ta haña ku gobièrnu hulandes mester papia mas aktivo ku Aruba, Sint Maarten i e munisipio Boneiru pa por manda Karel Doorman na tempu.
E barku di marina a bai Karibe un bia kaba pa motibu di corona
Fin di aprel Karel Doorman a sali pa e islanan ora tabatin un brote ei di e vírùs di corona. Ta e barku di mas grandi di Defensa ku hopi fasilidat médiko na bordo pa sostené e kuido médiko lokal.
E intenshon tabata e tempu ei pa Karel Doorman keda den Karibe tres luna, pero e barku a bolbe bèk pa Hulanda mas trempan. Segun Defensa e vírùs di corona tabata sufisientemente bou di kòntròl fin di yüni na e seis islanan.
E islanan ta purba di haña e vírùs bou di kòntròl
Kòrsou djaluna a registrá un total di kuater infekshon aktivo. Kontrali na Aruba i Sint Maarten, ei hende di áreanan di riesgo haltu manera Estádos Unídos no ta bon biní temporariamente.
Aruba kuminsamentu di ougùstùs a oumentá e posibilidatnan pa por tèst riba corona. “Aruba mundialmente ta riba di sinku lugá di pais ku ta tèst mas tantu pa persona”, segun Direktiva di Salubridat.