Portrèt: Nathaly Evertsz-Ipcedencia

KRALENDIJK – Sohaima M. ta mama di un mucha muhé di shete aña ku problema di kondukta. “Kasi mésora kos a bai malu ku mi yu muhé na un skol regular. Nos tur dos tabata masha infelis.” Pero kasi no tin alternativa i esaki ta pasobra, kontrali na Hulanda, no tin un lei di enseñansa spesial.

Sohaima su yu muhé tin un IQ normal, pero den u klas grandi e stimulashon ta di mas p’e. E skol a trata di duna guia spesial, su mama ta konta, pero finalmente e kos a bai malu tòg. E por a bai un skol privá sí. Pero e mama ta bisa: “Ta muchu karu, mi no por paga esaki.” Ke men e ta tene su yu na kas.

Den lei aktual tin pará ku riba e isla ta duna enseñansa inklusivo. Esaki ke men ku kada mucha mester haña lugá na un skol regular. Boneiru tin un skol básiko públiko pa mucha ku difikultat òf hopi difikultat pa siña. Pero pa mucha ku sí por siña pero ku pa motibu di, por ehèmpel, problema di kondukta no por bai un skol normal, kasi no tin enseñansa spesial.

‘Mucha ku problema di kondukta kompliká òf hèndikèp múltiple no por akudí niun kaminda na Boneiru’

Saby de Bies, direktor di Stichting Openbaar Onderwijs Bonaire, ta enfatisá ku e problemátika ta grandi. Mucha ku problema di kondukta grandi òf hèndikèp múltiple no por akudí niun kaminda na Boneiru. Ounke ku nan tin derechi riba enseñansa no tin posibilidat pa enseñansa spesial.”

E ta haña ku ta preokupante ku tin un grupo di mucha ku no ta haña atenshon. “Hopi mayor ku ta bini di Hulanda ta skohe pa duna enseñansa na kas sin pidi dispensashon ofisial.

Es ku por paga, por akudí pa enseñansa spesial serka e skol privá Het Koraal. Di esaki esun ku a lanta e skol, Vera Dohmen, ta bisa: “Tin hopi mucha ku tin mester di algu èkstra den enseñansa i e skolnan no por ofresé esaki. No tin lugá pa e muchanan aki i nan ta keda pegá.”

Hulanda ta responsabel
Diputado Nina Den Heyer ta bisa ku enseñansa spesial ta kai bou di gobièrnu di Reino hulandes. “Mi sa ku minister Slob (enseñansa) ta trahando riba un solushon.”
Ademas e ta haña ku tin sufisiente atenshon sí pa e problemanan ku enseñansa spesial. Kasi tur alumno di edat eskolar obligatorio ta konosí tambe serka e ámtenar di enseñansa obligatorio, segun Den Heyer.

Inspekshon tokante enseñansa spesial
Na 2017 Inspekshon di enseñansa hulandes ta mèldu bon notisia tokante e kontinuashon di enseñansa regular. Pero pa enseñansa spesial mester di hopi mas.