KRALENDIJK – “E intenshon tabata bon, solamente e bonerianonan no tabata por ku e kantidat di ámtenar i tantu ministerio di Hulanda”, diputado Nina den Heyer di Asuntunan Sosial ta bisa.
Entretantu ta dies aña pasá ku Boneiru a bira un munisipio ekstraordinario di Hulanda. Segun Den Heyer for di kuminsamentu e poblashon a ferwagt di mira e standart di bida bai dilanti. “E grupo di hende ku tabata pasa trabou, a bira solamente mas grandi. I e krísis di corona a hasi esaki pió atrobe”, Den Heyer ta bisa.
Dies aña despues e boneriano koutelosamente ta kuminsá probechá di su státùs aktual. Poko poko a oumentá suèldo mínimo, penshun di behes i ònderstant, akohida di mucha grátis despues di 10 aña ta un echo. “Falta hopi ainda pa nos yega, pero ta kla sí ku nos ta riba e bon kaminda”, Den Heyer ta kontinuá.
Kas pa biba
Bibienda tambe ta bai dilanti. “Ántes e supsidio di hür ku nos tabata haña nunka no tabata yega. Awor nos tin garantia for di Hulanda i tin supsidio di hür disponibel pa kasi tur kas. Esaki ke men ku hür ta pagabel awor pa tur hende”, Ben Oleana, direktor di Fundashon Kas Boneriano ta bisa. E aña aki nan a kuminsá ku konstrukshon di 500 kas di hür sosial nobo.
Banda di esaki segun Oleana e bonerianonan lo ripará ku e doñonan di kas lo no por pidi un hür masha haltu pa un kas ku bon mirá bal ménos. “Ta bini un lei pa protehá hürdó kontra esaki
Den kuminsamentu e kolaborashon ku Hulanda no tabata sosodé di mes. “Berdaderamente mi tabata lucha ku Hulanda. Asina tantu minister i sekretario di estado a bini i bai bèk, (sekretario di estado aktual) Knops te ainda ta e úniko ku berdaderamente a logra algu, pa loke ta trata di bibienda. Mester bisa esaki tambe. Poko poko nos ta haña komprenshon i rèspèt pa otro”, segun Oleana.
Den Heyer tambe ta rekonosé e lucha. Nos a logra mas na momentu ku nos a siña kon lòbi ku Hulanda.”
Státùs aktual
Riba e pregunta si, mirando bèk, e lo skohe pa e mésun státùs estatal atrobe Den Heyer ta kontestá afirmativo. “Awor lo mi tabata mas skèrpi i mihó prepará den e partimentu di tarea entre Boneiru i Hulanda.”
Ben Oleana awor tambe lo vota pa Boneiru komo munisipio hulandes; “Pero esei no ta nifiká ku aki 100 aña ainda tur kos mester ta asina ainda. Si nos ke sigui riba nos mes forsa, esei mester ta posibel sí. Aktualmente nos no por ainda.”
Investigashon di pobresa na Hulanda Karibense
E problemátika di pobresa na e islanan tin añanan kaba ta para haltu riba e agènda di Nationale ombudsman Reinier van Zutphen. Poko tempu ei huntu ku ombudsman pa mucha el a kaba un investigashon di pobresa bou di adulto hóben na Hulanda Karibense.
Aña pasá el a públiká e rapòrt ‘Bista pa hende grandi di edat na Hulanda Karibense, den kua ta trata e problema di pobresa bou di hende grandi di edat.
E último parti di e seri di tres investigashon lo trata di pobresa bou di mayornan soltero.