KRALENDIJK – “Nos no por keda hasi manera e vírùs no t’aki na e isla. E tempu sin prekupashon a pasa”, segun e epidemiólogo Marian Luinstra-Passchier tokante e brote grandi di corona na Boneiru.
Den e temporada di 29 di desèmber te ku 6 di yanüari 2021 e isla a haña 95 kontagio nobo. Entretantu tin 100 kaso aktivo i 365 hende den karentena. E kousa di mas importante segun outoridatnan: hende no ta tuma e reglanan di corona serio mas òf asta no ta tene nan mes na nan niun ora.
Segun e epidemiólogo a surgi un klùster nobo pa motibu di un fiesta riba di dos dia di Pasku. No opstante e konseho urgente pa ta huntu ku maksimalmente 25 persona, na e fiesta aki tabatin mas ku shen hende presente.
Fiesta grandi
Riba social media por mira diferente vidio di hende na fiesta ku no ta mantené e distansha di un meter i mei. Un señora boneriano di 64 aña di edat no a bai den karentena ounke e tambe tabata na e fiesta.
‘Mi sa ku mi no a kontagia ku e vírùs pasobra mi ta sinti mi bon”, e ta bisa. E no a hasi un tèst di corona.
Hende a bisa sin kuenta. E sifranan di awor ta mustra kiko esaki por okashoná”, Luinstra-Passchier tambe ta konstatá.
Riba social media i na radio tin hopi diskushon tokante kastigá e baidónan di fiesta i e organisadónan, sí òf nò. Bonerianonan ta bisa ku meskos ku na otro pais ku tin fiesta mester aktua mas severo.
Ministerio Públiko ta usa sanshon na man di direktiva pero nan no ta bai imponé e sanshonnan. “Ta polis ta duna but. Nan mester traha e prosès verbal pa Ministerio Públiko por aktua”, bosero Roderick Gouverneur ta enfatisá.
Polis no a konfirmá si berdaderamente el a parti but kaba. Na momento di publikashon di e artíkulo aki polis, Ministerio Públiko i e servisio di vigilansia i mantenshon tabata den deliberashon tokante esaki. Un mensahe di prensa mester sigui ainda.
Update:
Entretantu Boneiru a tuma medida nobo mas severo. Entre otro ku na enkuentro priva por ta presente maksimalmente dos famia di kas, den hóreka ta na vigor maksimalmente 4 persona huntu i na evento maksimalmente 25 persona kaminda ta prohibí pa kanta i baila.
E triángulo di fiskal mayó, e hefe di kuerpo i gezaghèber a disidí tambe pa aktua mas severo si violá e medidanan di corona. En bes di avisá i terminá fiesta i enkuentro, esnan presente por haña un but di 150 dòler. E organisadónan asta por haña falta di un echo kastigabel mas pisá. Esaki ta konta tambe pa hende ku sa ku nan a kontagiá, pero ta sali tòg