KRALENDIJK – “Laga nos dirigí nos mes riba partido ku ke sigui ku Hulanda Karibense i ku ta dispuesto tambe, meskos ku e gabinete aki di saka sèn èkstra p’esaki.” Asina sekretario di estado Raymons Knops di Relashonnan den Reino a bisa durante di un bishita di trabou na Boneiru.
Reportahe di Marit Severijnse (na hulandes)
Poko tempu ei den Tweede Kamer a entregá diferente moshon ku tin relashon ku e islanan karibense, di kua e mayoria tabata trata di e punto di èik di e mínimo di eksistensia. “E moshonnan ei ta forma parti di un debate polítiko, pero ku moshon riba nan mes bo no ta kambia nada. Ta manera chèk ku no ta kubrí, moshon ku ta pidi mas sèn sin ku bo mes ta duna espasio p’esaki, esei ta muchu fásil. Ke men laga nos dirigí nos mes riba gabinete nobo.” Asina Knops a bisa durante di su bishita di trabou.
E bishita ei ta den e kuadro di topa organisashon sosial i enseñansa. Asina entre otro Knops a hasi un bishita na Liseo Boneriano, Plenchi d Trabou , algun sitio rònt di e terminal di zeta i algun kompania di transpòrt.
Pobresa
Durante e bishita anterior na Boneiru na 2020 Knops a bisa ku pobresa ta un punto di agènda ku ta traha riba dje tur ku tin lòs di e situashon di corona. Asina lo evaluá e progreso pa mira kiko ainda ta nesesario. “Entre otro oumento di e mínimo sosial ta un trayekto ku mester kana un pia un pia. Nos a bisa ku nos lo evaluá esaki, pero aktualmente nos ta demishonario i esei ke men ku tur deseo pa un maneho nobo i sèn nobo mester laga pa e gabinete nobo. Knops ta spera ku e partidonan lo realisá loke nan a primintí durante elekshonnan si nan drenta gabinete. “Den e debate mi a eksperensiá ku den parlamento tin sosten amplio pa tuma e pasonan aki sí.”
Akuerdo di gobernashon
Na 2020 Knops a menta e progreso slo di e Akuerdo di Gobernashon. Kon e ta mira esaki awor? “Den raportahe a konstatá kaba ku tin debilidat rònt di e maneho finansiero. Ei ta duna asistensia kaminda por, pero naturalmente nos tabatin un vakatura un aña largu pa sekretario di isla. P’esei ainda nos no ta na e nivel ku mi lo ke, pero mi ta kontentu ku awor si nos tin un sekretario di isla ku por trata esaki.
Espasio pa mehorá e maneho di e kayanan
Pa loke ta e kayanan na Boneiru Knops ta bisa ku den esaki sí e tin konfiansa. No ta un problema di konosementu sino di funshon ku a yena insufisientemente. Bo mester tin maneho ku ta establesé polítikamente tambe, pa e ámtenarnan sa kiko nan mester hasi. Ei tin espasio pa mehorashon ainda. Pero den e área di ekspertisa i inmóbil mi ta dispuesto di pone hende ariba.””