WILLEMSTAD – “Si bo puntra hóben na Kòrsou si na mucha a yega di dal nan na kas, e mayoria lo konfirmá esaki.” Esei Ruchendell Windster di 28 aña di edat, mihó konosí bou di su nòmber di artista Boechi. Windster ta un rapper ku tin su raisnan na Kòrsou.
E grupo di proyekto Kas di Seguridat (Veiligheidshuis) Kòrsou a pidi Boechi pa koperá na un kampaña ku ke diskutí e efektonan negativo di e ‘tek korektivo’ P’esaki el a skibi un piesa pa hasi mucha, pero nan mayornan tambe, konsiente di e echo ku no tin nodi di dal ni grita. Ku por diferente tambe.
Kriminalidat
‘Bo ke mi komprondé òf bo ke mi sinti? Koregí mi, NO kibra mi’ ta un kampaña di e fundashon Kas di Seguridat Kòrsou, ku tin komo meta di baha kriminalidat na Kòrsou.
Kas di Seguridat tin sosten i organisashon di e fundashon Ambulante Justitiële Zorg Curaçao (AJJC, Kuido ambulante i hudisial Kòrsou) i ta finansiá pa Ministerio di Seguridat i Hustisia di Hulanda. E kampaña ke pa por papia di e efektonan i e konsekuenshanan di abusu di mucha.
reportahe di Kim Hendriksen (na hulandes)
“E troumanan grandi di hóben hopi bia ta keda tras di porta será. Un hóben asina ta bira visibel ora ku e eksploshon a sosodé kaba”, segun Viandrelica Narcisio, manager di proseso na Kas di Seguridat Kòrsou.
Oumento
E último añanan por mira un oumento di e kantidat di kaso ku ta drenta kaminda tin menornan di edat envolví. Tin bia ta trata di mucha ku ta mas hóben ku dies aña. “Nos ta mira ku e muchanan ku bini serka nos ta bira mas i mas hóben i nos ta ripará ku nan ta bira mas violente. Loke e muchanan aki tin komun ta ku nan ta bini di famia ku hopi problema kaminda tin hopi violensia. E muchanan ta mira esaki komo ehèmpel i ta usa e ehèmpel aki pa solushoná nan mes problemanan”, segun Narcisio.
‘Nos ke krea un base di sosten pa redusí abusu di mucha’ – Viandrelica Narcisio, Kas di Seguridat Kòrsou
Abusu di mucha segun e ousiliante ta un di e problemanan di mas grandi na e isla aktualmente. “Pa aña nos ta haña un 120 kaso. Setenta porshento di e muchanan ta bini di famia kaminda abusu ta masha frekuente. Esaki no ta solamente bati ku faha sino tambe otro forma di abusu di mucha manera maltrato síkiko i emoshonal.”
Proyekto di muzik
E Kas di Seguridat a skohe pa tradusí e mensahe den un forma ku ta apelá na hopi hende. “Nos ta trahando riba un proyekto di arte aki i e proyekto di muzik aki. P’esaki nos a buska un artista ku tin eksperensia ku esaki i ku ta yuda ku su talento pa tradusí e mensahe aki pa un públiko mas grandi. Nos ke krea un base di sosten pa redusí abusu di mucha ounke e ta algu kastigabel kaba”, segun Narcisio
Ku e piesa e ta spera ku mayor i mucha lo rekonosé nan mes aden i ku e víktimanan lo pidi yudansa. Narcisio: “Nos ke pa nan realisá ku ‘hè, mi no ta mi so, ta oké pa papia di esaki’ pasobra nan ta identifiká nan mes ku e artista. Mas hóben bo kuminsá ku e tratamentu mas mihó bo por limitá e daño serka hóben ora nan bira mas grandi.”