WILLEMSTAD – Den kaso ku no surgi solushon struktural pa e pèrdidanan ku CMC ta hasi tur luna, e mantenshon nesesario, ku e edifisio nobo I instalashonnan ta rekerí denter di algun aña por kore peliger. Asina por konkluí for di deklarashon di direktor di CMC, Gilbert Martina.
For di desèmber 2019, Martina a fungi komo direktor interino di CMC. Mientrastantu Gilbert Martina a bira direktor di Curacao Medical Center. Martina ta konsiderá e situashon finansiero di e instituto, komo e reto di mas grandi den su funshon aktual.
For di dia ku Hospital a habri, na Novèmber 2019, el a haña un presupuesto di kuido ku minister di Salubridat ta stipulá. Esaki no ta sufisiente pa kubri tur servisio i gastunan di kuido ku CMC ta duna pashèntnan ku ta sigurá na SVB. E falta di entrada, pa kumpli ku e gastunan, ta un dje retonan prinsipal pa Martina. “Nos ta hasi tur e trámitenan nesesario pa wak unda nos mes por baha gastu, pero tambe entamá kasonan hurídiko pa defendé posishon aki di CMC”, asina Martina ta bisa.
Seriedat dje situashon finansiero
Pa haña un indikashon di gravedat di e situashon mester menshoná ku tur luna CMC ta risibí entre 3.8 i 4 mion florin i CMC ta haña ménos na entrada kompará ku gastunan ku e tin. Miéntras ku CMC ta duna kuido na pashèntnan, te ainda e no ta drai ku ganashi. Gilbert Martina ta ilustrá kon difísil ta pa CMC funshoná ku e medionan finansiero ku e tin na su disposishon.
Gilbert Martina
Den yüni CMC pa medio di intermediashon di korte, a haña parsialmente, e sèn ku el a pidi gobièrnu pa kubri su presupuesto. CMC a pidi 28 mion i gobièrnu a aprobá 16.9 mion florin. Gobièrnu ta hasi e pago na CMC, den diferente tranche. E promé parti a tuma lugá na yüni último. Na desèmber e pago na CMC mester ta kompleto.
Un prenda ku ta rekerí atenshon
CMC ta un ‘prenda’ ku nos por ta hopi orguyoso di dje, pero tin situashonnan ku ta rekerí hopi atenshon i solushon. Minister di Salubridat, Dorothy Janga ta konsiente dje situashon finansiero prekario di CMC. E hospital nobo ta forma parti di un proyekto grandi di gobièrnu, pa kontrolá e gastunan den salubridat públiko, segun minister Janga.
E sosten di likididat ku Hulanda ta duna nos ta mará na algun kondishon. Esei ta pone segun minister Janga ku mester tene kuenta ku e gastunan di maneho den salubridat. Ta p’esei ta un reto pa evitá ku e gastunan di e ministerio di salubridat ku ta esun di mas grandi, no oumentá.
Minister di Salubridat Dorothy Janga
Covid i su gastunan
E gastunan di CMC relashoná ku servisionan ku e ta duna den kuadro di Covid-19 tambe ta pone preshon riba e situashon finansiero di CMC. Gilbert Martina ta menshoná entre otro e gastunan altu pa oksígeno.
Gilbert Martina
Mientrastantu gerensia di CMC a reuní ku minister di Salubridat, Dorothy Janga. Durante dje enkuentro a deliberá riba e puntonan di preokupashon di CMC.