WILLEMSTAD – Un Konseho di Partisipashon por solushoná e frekuente konfliktonan laboral ku tin último tempu na Kòrsou. Wardakosta por fungi komo ehèmpel ku Konseho di Partisipashon ta trese trankilidat den un organisashon. E balor di e Konseho di Partisipashon dentro di Wardakosta a demostrá su mes durante e último 12 aña i mei, den resultadonan positivo di e Konseho aki.
Resientemente Wardakosta, en konekshon ku su hubileo di 25 aña, a organisá un seminario pa kompartí su konosementu i eksperensia pa loke ta trata e tópiko aki ku diferente sosio i partnernan stratégiko, ‘stakeholder’ i otro interesadonan.
Konseho di Partisipashon
Eugene Middelhof, Direktor Suplente di Wardakosta, na e okashon aki a splika ku un Konseho di Partisipashon tin un bos den operashonnan di gerensia i nunka ta remplasá un sindikato.
Eks sindikalista i presidente di sindikato STRAF, Wim van Lamoen ta konfirmá esaki. Un asuntu remarkabel segun Middelhof, ta e echo ku e Konseho di Partisipashon ta algu úniko, pa loke ta trata su funshonamentu den e paisnan mes.
Eugene Middelhof
“E intenshon tabata pa pone kosnan kana pa medio di e Konseho di Partisipashon”, asina Wim van Lamoen ta komentá. Segun Van Lamoen e Konseho ta kita preshon for di riba asuntunan ku sindikato ta atendé. Algu ku ainda Van Lamoen ta deseá pa bira realidat, e kontribushon di gobièrnu den e Konseho di Partisipashon di Wardakosta.
Wim van Lamoen
Audio Wim van Lamoen
Hans Schreuder, èks Direktor Suplente di Wardakosta a introdusí Konseho di Partisipashon na Wardakosta. Na kuminsamentu e no tabata un proseso fásil, Schreuder ta bisa. Entre otro e sindikatonan tabata konsiderá e Konseho di Partisipashon komo un menasa. “Pero sin yudansa di Wim van Lamoen, komo presidente di sindikato STRAF, Wardakosta lo no por a realisá e Konseho”, asina Hans Schreuder ta afirmá.
Hans Schreuder
E meta di e seminario tabata pa kompartí e konosementu i eksperensia pa loke ta regardá e Konseho di Partisipashon, ku entre otro e servisionan Gubernamental, pa asina esakinan haña interes den e tópiko dentro di nan propio organisashon. Wardakosta a keda establesé na 1996 ku e meta, supervishon di laman den region di Karibe.