WILLEMSTAD – Kòrsou ta konosé un konsepto úniko den konstrukshon di kas, ora ku un invershon di mas di 100 mion florin, Vidanova ta konstruí e promé bario inteligente. E proyekto Hòfi Vidanova ta konsistí di 32 hectare na Schelpwijk, kaminda lo konstruí bibiendanan duradero i pagabel.
E proyekto ta konsistí di 396 kavel i lo ta konstruí, den dos fase, 260 kas I 64 apartamento. Na benta tin tereno inkluso kas pero tambe tin oportunidat pa konstrukshon di kas propio.
A kumpra tereno na 2013
Presidente di Stuurgroep di Hòfi Vidanova, Freddy Curiel, ta splika ku Vidanova na 2013 a kumpra e tereno serka e organisashon ESC, ku ta manehá penshun di èks trahadónan di Shell. Desaroyo di e proyekto a tarda, pero tempu a influensiá e proyekto positivamente, segun Curiel.
Freddy Curiel
Fondo di Penshun Vidanova ta esun di dos mas grandi na Kòrsou, despues di Algemeen Pensioenfonds Curacao. Vidanova tin aktualmente un kapital di mas o ménos 1500 mion florin. Vidanova a asumí e posishon ku si no tin proyektonan pa e invertí aden, e ta realisá su propio proyektonan.
Smart i duradero
Kiko ta ‘smart’ i duradero den e kuadro di medio ambiente na Hòfi Vidanova? Zarja Garmers, arkitekto i miembro di e stuurgroep di Hofi Vidanova ta splika kiko ta hasi e proyekto diferente na un proyekto regular di parselashon.
Zarja Garmers
Ta fangu awa di áwaseru tantu den bario komo na e kasnan. Ta re-usá e awa sushi parsialmente. Esaki ta bai un resiklahe ku ta tuma lugá den e áreanan públiko, na sierto sitio tin un ‘zuiveringinstalatie’. E instalashon ta limpia e awa anto ta bolbe usa e awa, pa hasi e bario mas bèrdè. Ora e bario ta kla I tur kas ta konektá riba dje, lo sobra awa. E awa aki, Vidanova ta deseá pa us’e pa otro barionan den besindario pa hasi tambe mas bèrdè.
Skarsedat di trahadó
Un dia despues dje anunsio públiko dje proyekto, Vidanova a organisá un asina yama ‘groundbreaking’ na Schelpwijk, kaminda lo konstruí e kasnan. Promé minister Gilmar ‘Pik’ Pisas tambe tabata presente I nos a puntr’e su opinion riba e proyekto piloto aki. Pisas ta kontentu ku un proyekto grandi asina pero na mesun momentu ta preokupá ku e skarsedat di trahadó pa konstrukshonnan grandi ku ta na kaminda.
Premier Gilmar Pisas
Premier Gilmar ‘Pik’ Pisas, huntu ku ministernan Charles Cooper (VVRP), Ruthmilda Larmonie-Cecilia (SOAW) a planta un palu di Mispel, pa simbólikamente realisá inisio ofisial di Hòfi Vidanova.
Gobièrnu ta sostené tipo di proyekto manera esun di Hòfi Vidanova, segun minister Charles Cooper di Tráfiko, Transporte i Urbanisashon Urbano. Den e kuadro aki minister Cooper a menshoná e Plataforma di Smart Nation di gobièrnu.
Premier Gilmar Pisas
Realisashon dje proyekto kompleto di Hòfi Vidanova ta tuma lugá entre 2021 i 2027.