WILLEMSTAD – Pa motibu di e ‘krísis mundial di kònteiner’ gobièrnu di Kòrsou ta adaptá un di e plannan den e akuerdo di gobièrnu. E tarifa di impuesto riba volúmen di benta, mihó konosí komo ‘ob’ lo no subi di 6% pa 7%.
Asina minister di Finansa Javier Silvania a laga sa. Den e akuerdo di gobièrnu di gabinete Pisas II tin pará ku e porsentahe di volúmen di benta lo kambia pa un tarifa fiho di 7%.
Preisnan di kònteiner
Den un splikashon Silvania ta indiká ku komo konsekuensha di Covid-19 e preisnan di kònteiner mundialmente a subi enormemente, loke ta pone ku produktonan aktualmente ta hopi mas karu. Segun Silvania ku esaki e forsa di kompra di pueblo di Kòrsou a bai hopi atras. E ta yama esaki ‘komprenshon progresivo’ pa no subi e tarifa di ob.
Oposishon
For di oposishon a bini krítika riba e oumento planeá. Èks minister di Desaroyo Ekonómiko, i lider di frakshon aktual di e partido MAN, Steven Martina siman pasá a bisa ku e kambio di e tarifa di ob tin konsekuensha enorme pa e forsa di kompra di pueblo.E desishon pa no subi e ob segun minister Silvania ta un ehèmpel di ‘komprenshon progresivo’.
Un oumento di ob di 6 pa 7 porshento den kombinashon ku e eliminashon di e rebaho di ob riba importashon segun Martina lo trese un oumento di preis enorme na Kòrsou. Segun e, produkto lo no bira 1% mas karu, sino 6.3%. MAN ta aploudí ku en todo kaso por lo pronto Silvania a retirá e plan.
Inflashon
Segun e sifranan di mas resien di e Ofisina Sentral di Estadístika (CBS) na Kòrsou e isla konosé un sifra di inflashon di 3.2 porshento. E kategorianan ku mas a kontribuí na e desaroyo di preis, den e temporada di ougùstùs 2021 kompará ku ougùstùs 2020, ta kuminda, biba i kuido médiko. Den e temporada menshoná e preis di kuminda a subi ku 6.5%.
E pèrdida di forsa di kompra pa e gobièrnu Pisas II, di kua Silvania ta minister, ta un punto importante. Oumento di bienestar i prosperidat di pueblo segun e akuerdo di gobièrnu ta e guia di mas grandi.