ORANJESTAD – No tin obligashon di tapaboka. no tin restrikshon pa hóreka i bishita di kas mas i ora di seramentu kòrtiku tambe a pasa: entrante 17 di febrüari Aruba ta terminá e medidanan di corona. Solamente na frontera mester tèst ainda.
Pero es ku tin dos bakunashon i un booster, no tin nodi di tèst i por drenta e isla libramente.
“Nos ta bayendo bon awor”, promé minister Evelyn Wever-Croes ta bisa na e anunsio. “Nos a sali di e di sinku ola.” E ola aki ku a kuminsá na desèmber ku e brote di omikron, meskos ku na otro parti di mundu a trese un rèkert di kontagio. Kontrali na Kòrsou den e ola aki tabatin ménos morto di corona na Aruba. E mayoria di morto di corona a kai aña pasá ku e brote di e vírùs delta.
Promé minister Evelyn Wever Croes ta bisa ku e ta retirá tur regla – potrèt Sharina Henriquez
Kuminsamentu di yanüari Aruba a laga sa kaba ku e ta traha riba un ‘strategia di exit’ pa por biba sin medida. Ku e plan gobièrnu ke deklará e pandemia komo endémiko i strukturá kuido di un manera ku strukturalmente lo tin sufisiente kama di IC (kuido intensivo) i personal pa por enfrentá brote.
E minister di salubridat e tempu ei a konta ku hòspital tin sufisiente sèn pa por regla esaki. Entretantu tòg ta bini 2,4 mion florin di e aseguradó nashonal AZV aserka pa ekspandé e IC.
Riba e pregunta kiko tur a regla kaba na e hòspital awor ku a retirá kasi tur medida, e promé minister despues di pregunta repetidamente di Ret Karibense no ta duna klaridat.
“Nos ta trahando ariba ainda. Kon leu nos ta, esei ta pregunta di e minister di salubridat. Nos mester retirá e medidanan awor pasobra no por responsabilisá esaki mas ku e sifranan (abou, red.) aki. Esei tin un motibu hurídiko.”
‘Nos mester retirá e medidanan pasobra no por responsabilisá esaki mas’
Aruba a pasa den sinku ola di corona – esun delta tabata esun di mas mortal.
For di 13 di mart ku a konstatá corona na Aruba, segun e sifranan di gobièrnu 33.531 hende a tèst positivo i 198 hende a fayesé di dje. Hopi hende ta ferwagt un suavisashon grandi kaba despues ku gabinete fin di siman pasá a partisipá di pèrmití un parada di karnaval riba 26 di febrüari i supsidiá esaki tambe parsialmente. E minister di salubridat Dangui Oduber ku tambe ta trata turismo, ke yuda gabinete ku esaki pa yuda e sektor sali for di e krísis.
Tabatin hopi krítika tambe. Manera di e sindikatonan ku tin lunanan kaba ta bringa gabinete tokante ekonomisashon. Djamars sinku organisashon di dunadó di trabou, ku tambe ta representá e sektor di turismo, tambe a reakshoná negativamente: “No ta responsabel pa selebrá karnaval aworakí. Nos ta pidi gobièrnu pa por ehèmpel ten’é na luna di mei ora ku ta e temporada abou i ku pues tin hopi ménos riesgo pa turismo, komersio i henter e isla.”
