Gabinete ta manda miembro di gabinete pa tur isla karibense i Sürnam pa ei pidi e despensa ku a warda hopi tempu, pa e pasado di sklabitut di Hulanda.
For di notisia di NOS – entretantu konfirmá pa gabinete – ta parse ku e miembronan di gabinete riba 19 di desèmber lo tene spich den e kolonianan hulandes anterior kaminda nan ta ekspresá repentimentu na nòmber di Estado Hulandes.
Sekretario di Estado Van der Burg (Asilo) pa e motibu aki ta bai Aruba, minister Van Gennip (Asuntunan Sosial) ta bai Boneiru, sekretario di estado van Huffelen (relashonnan den Reino) ta bai Kòrsou, sekretario Van Rij (Finansa) ta bai Sint Eustatius, sekretario di estado Van Ooijen (Bienestar) ta bai Saba i minister Kuipers (Salubridat Públiko) ta bai Sint Maarten.
Promé minister Rutte na Hulanda lo pidi despensa na Hulanda i minister Weerwind (protekshon di derecho) na Sürnam. Otro aña ta 150 aña pasá ku a abolí sklabitut na e kolonianan. Henter Reino ta konmemorá esaki.
E delegashon arubano (na man robes na mesa) ku a bai Kòrsou pa papia ku Van Huffelen tokante e konmemorashon di sklabitut 2023
Sekretario di Estado Van Huffelen e siman aki na Kòrsou a papia ku representante di tur isla tokante kon nan ta bai hasi esaki.
Mas sosten pa despensa pa sklabitut
NOS atrobe a laga hasi investigashon tokante kiko e hendenan na Hulanda ta haña di e despensanan pa sklabitut. E grupo di mas grandi ainda ta kontra, pero kompará ku aña pasá tin mas hende positivo sí. Na 2021 31 porshento tabata pro i awor esaki a subi bai 38 porshento. 55 porshento tabata kontra i entretantu esaki a baha bai 49 porshento.
For di investigashon ta sali mas aleu ku hende ku un desendensia di migrante ta keda haña e despensanan masha importante. Di e surinameñonan i hulandesnan karibense ku ta biba na Hulanda un dos terser parti ta pro.
