Mas ku dos aña Kòrsou a keda sin karnaval debí na covid. Pero e aña aki porfin por, i e entusiasmo ta mas grandi ku anteriormente. “Hopi bon pa nos ekonomia.”
Ainda no tin sifranan konkreto disponibel tokante e periodo di karnaval. Pero ‘tur e hotèlnan ta bon okupá’, asina Hans Slier di Chata (Asosiashon di Hospitalidat i Turismo di Kòrsou) ta splika. “Ketu bai nos ta mira un mix di turista”, segun Slier.
“Pa loke ta trata turistanan fo’i Oropa, nos tin e un tiki difísil. Paso n’e momentonan aki e buelonan ta limitá. Mi ta kere ku bastante hende ta bin fo’i Merka i Sur Amerika. Nos karnaval ta hopi apresiá den nos region. E ta atraé hopi hende di Karibe i Sürnam.”
“Nos karnaval t’e evento di mas grandi i importante pa nos isla”, Slier ta splika. “E festival di North Sea Jazz no ta bai tuma lugá e aña aki, pero si nos tin e esun di Blues. Ta e tipo di festivalnan aki ta pone nos riba mapa internashonal.”
Karnaval ta ‘hopi bon’ pa nos ekonomia. “I no nesesariamente pa hotèlnan”, segun Slier. “E ta kuminsá n’e hotèlnan i CTB ku ta atraé tur e turistanan. Pero karnaval ta benefisiá henter e ekonomia. Manera e lugánan di hür outo, skolnan di sambuyamentu i guia di turista. Al final tambe t’e bankonan ku ta benefisiá, e supermerkadonan i restorantnan.”
Muryad de Bruin (CTB)
Medionan internashonal i influencers Ofisina di Turismo ta bisa ku pa basta luna kaba nan tabata ‘hasiendo promoshon internashonal’ pa turistanan bin Kòrsou. “E interés ta mas grandi ku promé ku korona”, asina direktor Muryad de Bruin ta splika.
“Tambe nos tin un bon relashon ku medionan internashonal, i serka nan tambe bo ta mira ku tin mas interes. Nos ta kompletamente prepará pa mustra nan e mihó di nos isla. Tambe tin diferente influencers ku a bin kubri nos karnaval.”
Kon limpi Kòrsou ta?
Ofisina di Turismo ke pa e karnaval di Kòrsou ta ‘ekistoso na un nivel internashonal’. Pero tin un punto di prekupashon. “Un aspekto hopi importante ta: kon limpi nos isla ta”, De Bruin ta splika. “E kos ei ta un prioridat riba nos agenda, pa mantené Kòrsou limpi.”
Kòrsou ta luchando basta pa tene kayanan limpi i kombatí e dùmp ilegal den naturalesa. Minister Charles Cooper (Transporte) ke intervení riba termino. E minister ke pa krùsh e vehíkulonan ku a huza pa dùmp shushi ilegalmente, el a bisa anteriormente. Esei por skucha tambe den e episodio di podcast ‘De Vergeten Klimaatcrisis’.