Mas i mas famia den pobresa na Kòrsou ta pidi material pa skol i unifòrm grátis, e Sentro pa Inovashon i Guia Edukashonal (SIGE) ta bisa. E instansha di gobièrnu ta apelá na tur hende ku por yuda pa hasi esei.
Shete aña pasá kaba SIGE a kuminsá ku e proyekto ‘Duna un man na bo ruman’, pa kolekta kos pa yena un tas di skol ku kos pa skol. Den esaki entre otro tin un tròmchi pa pan, un tèrmu i un etuí yená. Danki na donashon di sèn tambe por a yuda famia pober ku unifòrm di skol.
Direktor di skol Eveny Maria-Lucacius ta bisa ku e ‘ta masha kontentu’ ku su skol ta bini na remarke pa yudansa for di SIGE. Di e mas o ménos 300 alumnonan na e skol, mayoria mester di yudansa.
Unifòrm nobo grátis
Maria-Lucacius tambe ta spera di haña unifòrm nobo grátis, pa kua e nesesidat ta grandi. E skol anteriormente kaba a hasi un apelashon: es ku tin bon unifòrm i ku no mester di nan mas, por fabor duna nan.
Pero e apelashon tabatin poko resultado. Segun e direktor di skol esei ta un señal tambe ku finansieramente e mayornan tin difikultat. Ta keda usa unifòrm di skol te ora berdaderamente no por mas.
Speransa pa mas donashon
Aña pasá SIGE por a yuda 670 mucha ku material pa skol. ‘Tur esei ta danki na e spònsernan i komunidat di Kòrsou, pero tambe e personanan ku ta sigui Ret Karibense na Hulanda ku ku masalmente a tuma akshon pa yuda’, e kordinadó di proyekto Eveline Blijden ta bisa.
Blijden ta spera ku e aña aki atrobe lo tin donashon. E kolaboradónan di SIGE durante nan bishitanan resien na skolnan na e isla ta ripará ku diferente mucha i hóben (4-24 aña) mester di artíkulo pa skol. Pesei tin algun mucha di skol ku no por sigui enseñansa bon.
E meta di e aña aki ta pa yuda 750 alumno. Segun SIGE mas hende ta konta ku yudansa, pasobra pa hopi hende ekonómikamente kos ta malu. Inflashon mundial tambe ta hunga un papel.
‘Tin mayor ku tambe tin problema finansiero, por ehèmpel atraso den pago di hür. Algun mayor ta traha, pero no por sali ku nan sèn’, bosero Monti Girigoria ta bisa. ‘Ta un sakrifisio inkreiblemente pisá ku mayornan ta enfrentá ora skol kuminsá atrobe. Ta di spera ku nos por yuda 2000 mucha, pasobra bon mirá ta esei ta nos meta.’
Sí mi ta yuda
Si bo ke yuda SIGE ku material pa skol òf duna sèn, manda un mail pa info@sige.cw òf tuma kontakto telefóniko via +59997386570. Na Kòrsou bo por pasa na SIGE pa duna material òf sèn; tambe tin un buson di donashon na Building Depot.
Un otro manera pa kisas yuda, ta pa kompartí e artíkulo aki ku mas tantu otro hende posibel. Por ehèmpel via Whatsapp, Facebook òf LinkedIn. E yudansa di gobièrnu pa mayor ku tin tiki moda, den práktika no ta niun tiki sufisiente. E yudansa ku SIGE por duna den e aña di skol binidero, pues ta dependé di donashon privá.
SIGE ta bisa ku e aña aki nan ta tene un inventarisashon trempan. Ta pidi kabesnan di skol di diferente instansha na e isla pa reuní i klasifiká famia ku mester di yudansa.
