Djaweps ta transmití e dokumental Tula Leeft! (Tula ta biba!), un programa di NTR na kanal NPO 2 di Hulanda. E kantante kurasoleño Izaline Calister ta invitá e músiko i trahadó di teatro Thijs Borsten pa na su isla pasa e ruta di e luchadónan di libertat. Tur dos ta topa kompañero isleño ekstraordinario ku ta konta tokante Tula.
Tula ta e kara di e rebelion di esnan sklabisá di mas grandi ku a kuminsá riba 17 di ougùstùs 1795. Izaline Calister ta hiba e televidente e sitionan di mas importante na e isla, riba e ruta di e héroenan di resistensia, den direkshon di Willemstad. Es ku mira e dokumental ta siña pakiko Tula ta asina importante pa Kòrsou.
Influensia di Tula
Durante e rekorido nan ta topa artista, músiko, historiadó i un pastor ku ken nan ta papia tokante Tula i e influensia ku e tin awendia. Kiko ta nifiká libertat? I kiko nos por siña awe di Tula i tur ko-luchadó?
Na final di kada kombersashon Izaline Calister ta kanta un kantika ku ta konektá ku esaki. Por ehèmpel na Landhuis Knip, kaminda e lucha di e esnan sklabisá a kuminsá, e ta kanta ‘Nonze su kantika’, tokante un persona sklabisá ku ta morto kansá.
E dokumental ta mustra paisahe presioso di e isla. Na e playa trankil di Santa Krus tambe nan ta toka un piesa ora solo ta baha. Den e ambiente aki e lidernan Tula i Bazjan Karpata a topa otro. Huntu ku un grupo nan e bebe e awa sagrado di yerba i ku esei nan a hura ku nan lo duna tur loke tin pa na Willemstad haña nan libertat.
Kombersashon ku pastor
Serka misa di Willibrordus Izaline tin un kombersashon ku pastor Curtis Meris. E ta toka un kantika impreshonante, komo mensahe pa e pinturanan ku e ta mira kologá ei. “Pastor”, despues e ta puntra yen di speransa. “Pastor ta kere ku un dia nos na Kòrsou lo mira pintura i dibuho den misa ku hende di nos koló?”
Na Willemstad nan ta para na e sitio kaminda a kologá e kabesnan di Tula i e ko-luchadónan, komo aviso pa otro hende pa no rebeliá. Segun Jeanne Henriquez di Museo Tula ta bon pa hasi e pregunta: kiko awe nos por siña di Tula? Fasiná pa e liderazgo di e héroe, Izaline Calister ta haña un mensahe personal di Henriquez.
Thijs Borsten ku riba guitara ta akompañá Izaline Calister, tin hopi pregunta despues di e diferente kombersashonnan ku yunan di Kòrsou. “Pakiko mi sa asina tiki di esaki?”
Mira e transmishon
E dokumental ta pasa na televishon djaweps 17 di ougùstùs, e dia di e konmemorashon di Tula su rebelion, kuartu pasá di sinku di atardi den Karibe i kuartu pasa di diesun di anochi na Hulanda na NTR na NPO2.
Mesora despues di e transmishon na NPO 2 Extra por mira e konsierto serka e dokumental aki, ku a graba na plantashi Sòrsaka na Kòrsou komo e desenlase di Tula su biahe.
NPO 2 Èkstra ta ripití tur dos programa riba djaluna 2 di òktober mitar di nuebe di anochi, e dia promé ku e rehabilitashon di Tula pa gobièrnu hulandes ta tuma lugá. Pasobra riba 3 di òktober 1795 gobièrnu kolonial hulandes a ehekutá Tula. Tur hende tambe por mira e programanan digital via npostart.nl.