Artista plástiko i sineasta Kevin Osepa ta risibí hopi interes. E Yu di Kòrsou ta na kaminda pa Hollywood, awor ku e ta gana diferente premio pa su obra. E echo ku e ta haña asina tantu rekonosementu, bon mirá e ta haña ‘strabagante’.
Resientemente Kevin Osepa a gana e Amsterdamprijs voor de Kunst (Premio di Amsterdam pa arte). Den un aña tambe el a gana e premio Charlotte Köhler i un Gouden Kalf pa e Mihó Sine Kòrtiku. E tin mas premio na su nòmber. “Ainda mi ta haña esaki strabagante”, Osepa ta bisa koriendo su baiskel na Amsterdam.
Osepa ta traha sine i saka potrèt di e partinan di kultura karibense ku ta haña tiki atenshon. For di su identidat e ta wak e impakto di por ehèmpel kolonialismo, spiritualidat Afro, laso di famia i di ta ‘queer’.
“Ta duna bo un empuhe pa bo tende ku bo ta traha asina bon. Sigur sigur mi ta gradesido tambe pa e premionan, pero mi ta haña rekonosementu algu masha masha kompliká. Ta straño pa haña rekonosementu pa algu ku ta masha personal.”
“Mi ta mira rònt di mi, mi ta apsorbé i kuestioná loke mi mira, i mi ta traha mi obra tokante esaki”, Osepa ta splika. “E echo ku mi por ta kompletamente mi mes den mi trabou, i ku mi ta haña reakshon tokante esaki di hende masha normal, ta hasi mi un hende felis.”
Osepa mester bai un último sita purá promé ku e tuma avion pa Los Angeles. “Ta bai pasa mi sine La Última Ascension pa profeshonalnan na Hollywood. Kisas esaki lo hiba mi karera un paso mas aleu.”
‘Pa mi mayornan fotografia tabata un guèmbel’
Na mucha Kevin ta okupá su mes fanátikamente ku teatro. “Hende tabata bisa: Kevin tin talento! Mi mama a bisa: kisas bo mester stòp ku esaki, ora ku mi tabata bai mas malu na skol. Ku tòg mi a bai studia fotografia tabata un guèmbel pa nan.”
Kevin na hóben nunka lo no a pensa ku e por a yega asina leu. “Mi mayornan ta orguyoso. Hopi hende, tambe mucha di skol, ta pensa ku bo ta haña seguridat den bida solamente ku estudio manera lei. Komo alumno di skol bo mester tin kurashi pa sigui bo kurason, asina mi ta realisá awor.”
Mas espasio pa otro hóben
Osepa ta ripará ku hóben ‘ta haña mas espasio’ pa sigui nan kurason i ta ‘pusha’ nan ménos. “Masha positivo. E tin di hasi ku bo ta mira mas i mas hende karibense ku ta eksitoso den arte, kultura i periodismo. Asina tambe por!”
“Loke bo no ta mira mésora, ta ku hopi di nos hendenan eksitoso ta yuda otro hóben”, Osepa ta ripará na Hulanda. “Mi ke kontribuí na esaki tambe.”
Danki na e premionan mas i mas ta pidi mi pa ekshibishon. Mi ke kompartí mi plataforma ku otro hóben karibense. Mi sa ku si tin un Stedelijk Museum riba nan cv, e ora ei e portanan ta habri pa nan.”
Su konseho na mayor i alumno na e islanan? “Bo sa, nèt den e loke ta deskonosí tin hopi oportunidat. Trata di buska bo mes bos. Ta trata di loke ta hasi abo kurioso, loke ta frustra abo i kiko berdaderamente ta apelá na bo kurason. Pero no hasié pa rekonosementu. Es ku sigui su kurason por hasi un impakto riba mundu.”
Mas tokante Kevin Osepa
-Kevin Osepa a studia na Hogeschool voor de Kunsten Utrecht (HKU) i e ta traha na Utrecht. E tabatin ekshibishon na Tent na Rotterdam, Stedelijk Museum na Amsterdam. A inkorporá su obranan den e Kolekshon di Reino, Museo di Dordrecht i Museo Boijmans van Beuningen.
-Banda di su fotografia artístiko i sinenan, e tabata direktor pa revista manera Vogue i marka di moda manera Calvin Klein.
-Pa e kontribushon hulandes di Eurovisie Songfestival di 2021, el a visualisá e letra di Jeangu Makrooi den e video musikal.
-El a kolaborá na e dokumental ‘Slavernij en wij’ (NTR-NOS).