Durante e yegada di San Nicolas na Boneiru e aña aki tabatin Zwarte Piet tambe. Si ta na gobièrnu polítiko, esaki ta e último bia tambe. For di 2024 tin solamente ‘piet di hopi koló’, diputado Nina den Heyer ta bisa.
Na 2020 diputado Nina den Heyer na nòmber di e Bestuurscollege di e tempu ei a bisa ku lo no mira Zwarte Piet mas durante e yegada. Tòg esaki a sosodé e aña aki. “Mi tambe a spanta”, Den Heyer ta reakshoná, ku despues di un temporada di mas o ménos un aña ta diputado atrobe.
Na Hulanda Oropeo kada bia tin ménos sitio kaminda ta mira Zwarte Piet. Ku e ora ei nèt na Boneiru, ku su pasado kolonial, por mira Zwarte Piet, a kousa reakshon indigná den medionan sosial. Tambe for di e komunidat karibense na Hulanda Oropeo.
“Si, mi ta komprondé esei. Na Hulanda e diskushon tei hopi aña kaba i esei ta bai huntu tambe ku konsientisashon. Aki tambe e kòmbersashon tokante di esaki ta kuminsá poko poko, pero e no tin e forma i e no ta asina impetuoso na Hulanda.”
Kon bo ta mira bo funshon komo diputado den asuntu aki?
“Mi tin e intenshon sí di bai papia ku hóben atrobe pa tende nan opinion tokante esaki. Pero tambe pa atendé ku mas konsientisashon. Nos no por fòrsa nada pero nos mester guia sí.”
Di vários mayor bo ta tende durante e último entrada ku nan no tin opheshon kontra e figura Zwarte Piet. Kon bo ta anda ku esaki?
“Aki tambe e relato semper tabata ku Zwarte Piet aki – na Boneiru – ta pretu pasobra e mester a pasa dor di skorsten. Un parti grandi di pueblo no ta mira esaki komo diskriminashon. Mi a komprondé di algun hóben ku nan ta mira e kos manera karnaval. Ei tambe ta disfrasá i pasa prèt.”
“Algun aña pasá aki na Boneiru sí a skohe konsientemente pa Zwarte Piet no tin roe mas, pasobra nos ker a fókùs riba edukashon positivo. Esaki si a kai na smak i tambe ta pas den e imágen di amigu di mucha. Ta trata di konsientisashon.
E intenshon for di polítika lokal tabata ku kambio ta bini un pia un pia. Pakiko anto e aña aki ainda a mira Zwarte Piet na e entrada?
“M’a komprondé ku ku e organisashon nobo aki tambe a palabrá Piet di hopi koló. Mi a rekordá nan riba e palabrashon. Pero a traha e palabrashonnan aki despues ku mi a drenta den funshon.”
Awor bo ta diputado atrobe. Kon e Yegada di San Nicolas lo mustra na 2024?
“E ta bira un yegada ku solamente Piet kolorido. Nos a palabra esaki kaba huntu na Bestuurscollege. Nos lo bai evaluá esaki tambe ainda ku e organisashon di e entrada.”
