Vakashon di krusero pa islanan karibense ta masha popular. E hafnan di krusero na e islanan ta yena mas i mas ku barku ku ta mara ei i e kantidat di biahero na bordo. Kompania di krusero tambe ta mira ku e interes ta krese serka bishitante di e feria di vakashon.
Esei ta bon pa e ekonomianan lokal, pero e otro banda di e medaya ta ku tur e barkunan aki no ta masha bon pa e medio ambiente i nan lo ta ko-responsabel pa e menasa pa koral.
E kompanianan di krusero i e sektor di turismo ta konsiente ku tin pregunta tokante esaki. Esaki ta konta tambe pa algun bishitante di e Feria di Vakashon ku a tene e siman ku a pasa na Utrecht. Pero e pregunta ta si esaki ta bai kita nan di hasi un krusero.
Koral
No ta bai muchu bon ku e koral kantu di e kostanan karibense pa motibu di e enfermedat kontagioso di koral. Tambe kambio di klima ta forma un menasa pa e koral pasobra e keintamentu di e awa di laman ta fatal pa e koral.
I e kantidatnan di barku krusero enorme ta kousa hopi daño. Awa shushi, plèstik i otro shushi di e barkunan krusero hopi bia ta resultá den laman. I tambe e gasoil diki, ku e barkunan ta usa, ta forma un menasa pa e koral.
Feria di vakashon
Mayoria bishitante di e Feria di Vakashon ta soña kaba di un krusero di e laman Karibe blou bunita. “Esta bunita, un hotèl ku ta nabegá”, un dama ta bisa ku entusiasmo. Un bia so i bo ta desempaketá bo no tin niun prekupashon pasobra despues di bo ekskurshonnan bo ta kome dushi.”
Kompania krusero i e sektor di turismo ta kontentu ku e interes ku ta krese. Pero nan ta bisa tambe ku nan ta prekupá pa e destino di e koral.
“Último añanan nos a konstruí dos terminal di krusero i nos a trata di evitá di daña e koral”, Muryad de Bruin di Ofisina di Turismo di Kòrsou ta bisa. Ora di traha e terminalnan sí lo a a daña e koral na sierto sitio.
Un otro medida ku ta menta ta e purifikashon di awa, pa asina no tin nodi di karga awa èkstra. Pasobra barku pisá ta daña e koral. Asina tambe tin mester di ménos plèstik na bordo i ta resiklá papel.
Tambe tin algun kompania di barku ‘ku ta wak barku eléktriko’. Pero esei no tin hopi ainda. “Si, pa kambia rumbo, esei ta basta difísil ku un barku grandi asina”, un señora ku a hasi hopi krusero kaba ta bisa.
Planta koral atrobe
Roderick Schmitz di Dive Centre Scuba Do na Kòrsou ta planta koral di nobo i no ta mira e kos muchu skur. “Nos mester di e koralnan aki pa mantené nos deporte i nos kompania. Nos klientenan ta bira konsiente di e medio ambiente i asina bo ta pèrkurá pa mantené e koral. Tur pida pida kos ta yuda.”