Si sigui pensamentu di e gobièrnu lokal di Boneiru pronto mester bira mas difísil pa estranheronan establesé riba e isla. For di 10 di òktober 2010 e poblashon di Boneiru a krese enorme. Na e momento aki Boneiru a surpasá 25 mil habitante. Dado momento a karakterisá esaki komo un kresementu deskontrolá.
E konsekuensia pa e isla i pa e poblashon ta opvio. A surgi entre otro skarsedat di bibienda, skarsedat di lugá na akohida di mucha i skol, preshon enorme riba e infrastruktura di e isla i tambe subida di kosto di bida.
Preshon riba kultura i idioma
E fluho grandi di imigrante tin komo konsekuensia ku awor solamente 33 porshento di e poblashon ta Boneriano. Polítika ta mira esaki komo un preshon riba kultura i idioma di e isla.
Banda di esaki ya pa algun luna outoridat a bati alarma bisando ku Boneiru a bira mas insigur, habitante ta pèrdiendo e sentimentu di trankilidat i seguridat. E nesesidat pa atendé ku esaki ta grandi.
P’esei e gobièrnu lokal ke bai pa limitá e fluho deskontrolá aki. Dianan 4, 5 i 6 di mart tabatin un konferensia di trabou pa atendé revishon di Wolbes i Finbes na Hulanda. Konseho Insular di Boneiru den su mayoria a stipulá un dokumentu pa atendé ku esaki. Kon pa limitá e kantidat di hende ku ta bin biba na Boneiru ta un punto kardinal.
Gobièrnu lokal ta bai ku e mira pa stipulá kondishonnan mas estrikto pa atmishon i estadia di estranhero. Na e momento aki un persona mester kumpli ku e reglanan pa ku kas i entrada si e ke haña un pèrmit di estadia. Awor Boneiru ke pa estranheronan bin na remarke solamente pa un estadia temporal di 5 aña.
Dominio di papiamentu
Den e 5 aña aki e persona mester sigui un kurso di integrashon i tambe dominio di papiamentu ta obligatorio. Despues di kumpli ku esaki por yega na remarke pa un estadia permanente.
Konseho Insular ta papia palabra kla. “Personanan ku no ta Boneriano ta bon bini semper i kuando nan ta dispuesto pa profundisá den e idioma i kultura di e isla.”
For di komunidat ta aploudí e inisiativa aki. “Nos ta lat mes. Masha dia mester a stòp e kos aki. Tur hende ta bin biba aki i pa nos mes no tin ni kas ni trabou”, e boneriano Arnold ta bisa.
Sin embargo e pregunta ta surgi si Hulanda ta bai di akuerdo ku e adaptashon aki. Maneho di atmishon i estadia na Boneiru ta responsabilidat di Hulanda. Ta konosí ku Boneiru ta hopi atraktivo pa e hulandes oropeo. Sí Hulanda bai di akuerdo ku e proposishon di Boneiru aki, ta nifiká ku ménos hulandes oropeo ta bin establesé. Mirando ku e reglanan ta bira mas estrikto.
