Kuerpo polisial di Kòrsou lo no sosegá promé ku solushoná e asesinato di Toon Brood, e adjudant di Koninklijke Marechausse. Asina polis na Kòrsou a duna di konosé. Djabièrnè 31 di mei djis promé ku mei anochi a tira Brood di 49 aña mata den su mes kas.
E asesinato a lòs hopi emoshon na Kòrsou, pero na Hulanda tambe. Brood tabata un kolega hopi apresiá. E asesinato ta inkreiblemente violente.
Reigerweg
Djabièrnè banda di kuartu pa diesun di anochi sentral di polis a risibí un notifikashon ku habitante den bario di Reigerweg a tende un hende muhé ta grita pa ousilio. Inmediatamente a manda un unidat di polis pa e sitio.
For di investigashon a sali ku Toon Brood, un hòmber kurpa grandi, muskulá, ku un barba grandi, huntu ku su señora tabata sinta patras den balkon di su kas ora nan a tende un zonidu. Toon a lanta pa bai wak ta kiko a sosodé i djis despues e señora a tende un tiru.
Despues tres hòmber parsialmente ku maskarada bistí i ku arma a drenta i menasá e señora. Nan a kue sèn i yabi di outo i a listra un parti mas di e kas. Despues nan a kore bai ku e outo di e pareha. Brood a muri mésora. Personal di ambulans no por a hasi nada mas p’e.
Djasabra meinta tabatin un rueda di prensa ku hopi hende presente, kaminda e hefe di polis, Raymond Ellis, i fiskal mayó Heiko de Jong a papia.
Imágen i kámara
Entretantu a haña e outo hòrtá. Pero polis ta pidi tur habitante ku tin imágen di kámara den e área di Reigerweg i e bario Vetter, pa kontrolá imágen di nan kámara di djabièrnè anochi entre diesun or i mei di anochi i djasabra meinta pa posibel imágen di e sospechosonan i e vehíkulo.
Ta trata di un Chevrolet Beat oraño ku e number B 36-0. Tambe a saka un yamada pa e tres perpetradónan pa nan mèldu serka un warda di polis.
Polis ta konsiderá e kaso aki komo masha serio i insolente. E último kaso asina aki a tuma lugá na mei 2019, polis ta bisa. Ellis a enfatisá: “” No por permití òf tolerá kaso asina den nos komunidat, kontra ningun siudadano.
E bosero di Kuerpo di Polis di Kòrsou, Maurits Rosalina, mas lat den wikènt a apelá na e tres sospechosonan ku ta enbolbí den e atrako violente i fatal aki pa entregá nan mes na tur warda di polis.
Apelashon pa denunsia
“E akto aki a shòk henter Reino hulandes. Un apelashon na abo, bo famia i mayornan di esnan ku a kometé e akto aki, pa papia ku nan i enkurashá nan pa denunsiá nan mes awe mes. Kuerpo di Polis Kòrsou ta garantisá ku si bo denunsiá bo mes, bo lo haña un proseso penal honesto.”
Kuerpo polisial lo no sosegá i lo traha dia i anochi pa resolvé e kaso aki, Rosalina a enfatisá.
Vigilansia di frontera
Toon Brood for di yüli di 2022 tabata traha na aeropuerto di Kòrsou. E tabata e di dos lider di tim di e Plan Versterking Grenstoezicht Curaçao (Plan pa reforsá vigilansia di frontera Kòrsou) i segun un mensahe di e Representashon e tabata ‘masha embolbí den su trabou’.
Ofisial mayó Heiko de Jong ta yama e asuntu un insidente teribel. “Esaki ta mustra atrobe ku nos tin un problema grandi ku arma di kandela ilegal, ta traha duru riba esaki kaba. Kisas ku e insidente aki ta kondusí na e echo ku nos por trata e problema ku mas seriedat ainda i ku por oumentá e kastigunan pa poseshon ilegal di arma.”
E ta spera ku parlamento tambe lo tende su apelashon. Segun De Jong ta traha duru pa arestá mas hende. Den pasado a organisá akshon pa entregá arma. Esaki segun e lo por yuda atrobe, segun De Jong.
Investigashon ta kanando den bon direkshon
Dia 7 di yüni polis di Kòrsou a duna di konosé ku e investigashon den e kaso di asesinato di e adjudant di Koninklijke Marechausse ta kanando den bon direkshon. Polis ta trahando di dia i anochi pa solushoná e kaso, pasobra manera ya anterior a keda informá, ku e aktonan brutal aki no ta tolerabel kontra ningun siudadano ni bishitante di nos isla.
“Kuerpo Polisial ta gradisí tur siudadano ku ya kaba a duna nan koperashon na e investigashon i ta sigui konta riba aporte di esnan ku ainda ke duna hustisia un man den solushon di e kaso aki. Por hasi uso di e numbernan di telefòn 917 of 108 si bo ta desea na keda anónimo.”