For di aña pasá tin mas atenshon pa siguridat na Sint Maarten. Esei ta konsekuensia di diferente tiroteo den 2024, kaminda múltiple morto a kai. Pero tambe ta konsekuensia di un serie di aksidente di tráfiko serio i un gran kantidat di arma riba kaya. Pa motibu di esakinan a bin ta tene kontrolnan ámplio di tráfiko for di 2024. Nan a tuma lugá den ougùstùs rondó di e elekshon di aña pasá i na fin di aña. E aña akí ya a tene dos kontrol kaba.
Polis a tene operashonnan dirigí entre 6 i 10 di yanüari, den e áreanan Philipsburg, Cole Bay i Simpson Bay, den koperashon ku rishèshi. Esaki a kondusí na aresto di diferente persona ku tabata den poseshon di arma i droga.
Kontrol di siguridat general
E luna aki kuerpo polisial di Sint Maarten a efektuá kontrolnan general i di siguridat grandi serka di Harold Jack na Brouwers Road. Esakinan tabata dirigí riba mehorashon di siguridat públiko i mantenshon di regla di tráfiko.
Den esaki a interseptá un vehíkulo hòrtá durante un kontrol rutinario. Den un otro outo a deskubrí un kaha ku munishon. Den tur dos kaso a arestá e shofùr na e sitio i a konfiská e munishon.
Droga deskubrí durante kontrol di tráfiko
Riba dia di San Valentino, un kontrol rutinario di tráfiko a kondusí na deskubrimentu di un gran kantidat di droga den un outo, i despues tambe na kas di e shofùr. Esaki a sosodé ora a dun’é un but na warda di polis, pero e no tabatin sufisiente sèn huntu kuné. El a pidi e agentenan polisial pa bai kas kuné pa e kue e sèn.
Ei e polisnan a topa ku un gran kantidat di droga, manera kokaina, píldora di XTC, hashis, marihuana i mas aleu skalchi pa pisa droga i material pa empaketá esakinan. Banda di esei a konfiská mas o ménos dos mil dòler, huntu ku e droga. Por lo pronto e hòmber akí ta será.
E kontrolnan di siguridat i di tráfiko ta forma parti di un aserkamentu kontinuo pa kombatí kriminalidat riba e isla. Riba esei ta bini ku tin preokupashon ta reina tokante e kuerpo polisial. E gobernadó di e isla, Ajamu Baly, a papia di ‘un desekilibrio den e kadena hudisial’ den un serie di punto di atenshon ku el a duna e gobièrnu aktual mitar aña pasá.
Iregularidat
Tabatin hopi insidente den 2024; asina un militar hulandes a risibí leshon durante iregularidatnan den Dutch Quarter, na kaminda pa e elekshon di 19 di ougùstùs. Djis promé ku esei a tira e esposa di e polítiko Olivier Arrindell mata, ora ku e tabata sintá den outo huntu ku su kasá.
Despues di kada insidente ta lanta un gritu pa mas kontrol. Polis ta bisa ku nan lo sigi ku esaki tambe. Loke ta remarkabel kada bes na e kontrolnan, ta ku tin relativamente hopi arma den sirkulashon riba e isla.
