Bou di e título di: ‘Barionan pober ta keda den problema añ’aden, añ’afó‘, Ret Karibense ta dediká atenshon na desaroyo di e barionan pober na Kòrsou. E intenshon ta pa ilustrá kiko a kambia a traves di añanan pa e barionan marginalisá akí. Na e okashon akí nos ta pone atenshon na e bario di Koraal Specht: “Violensia a baha, pero tin reto nobo.”
Un trankilidat ta vibra na un di e entradanan prinsipal di e bario Koraal Specht, ku te ku algun aña pasá tabata hopi stigmatisá debí na violensia i kriminalidat. Ta berdat ku e ambiente a bira mas trankil?
Sherwin Margaretha. Portrètnan: Dulce Koopman
Segun Sherwin Margaritha, di Sentro di Bario Koraal Specht, e kousantenan di desorden entretantu sea ta tras di trali, a emigrá òf a fayesé. Rondó di e dos iglesianan tin e sinku skolnan, di kua tres ta duna enseñansa spesial no solamente na e muchanan di bario pero tambe na alumnonan di rònt Kòrsou.
Sentro di Bario Koraal Specht
Parke bandoná, sentro bon mantené
E Parke Rekreativo ta duna un bista bandoná i tin mantenshon atrasá. Dilanti di e Parke, e Sentro di Bario ta situá. Parti paden e sentro ta bunita, limpi i bon mantené. E ta ofresé fasilidatnan pa e habitantenan di Koraal Specht i pa hende i organisashonnan pafó di e bario.
Pero kon por deskribí e situashon sosial aktual di Koraal Specht? Awor ku e kriminalidat a bira ménos, otro problema a keda ku mester di atenshon urgente.
Asina Margaritha ta splika.
Audio 1 Sherwin Margaritha
No opstante e problemanan ku ainda tin, Margaritha no ke kualifiká Koraal Specht komo un bario pober. “Ta un bario riku na konosementu i kultura. E tin su parti religioso, deporte, un vèlt di deporte ku ta kasi klá i tin profilashon artístiko.” E representante di bario ta sigi menshoná: “Nos tin hende ku hopi potensial, pero mester yuda nan i ofresé nan e hermèntnan pa nan funshoná.”
Den kuadro di e yudansa ku ta ofrese e habitantenan pa kontribuí na nan mes desaroyo, tin e biblioteka di e Sentro di Bario. E ta hunga un ròl importante. No solamente pa e muchanan, pero tambe pa e mayornan.
Audio 2 Sherwin Margaritha
Un di e puntonan urgente ku tambe mester haña atenshon, ta e situashon di e grandinan den e bario. Entre otro por menshoná isolashon, depreshon i maltrato di e habitantenan di edat avansá.
“E maltrato no ta visibel, pero e ta eksisti.” Margaritha ta bisa tambe ku e situashon finansiero di e grandinan ta hopi malu, i ku sa sosodé ku nan no tin sufisiente sèn ni pa kumpra remedi. Tin vários proyekto pendiente pa realisá na Koraal Specht, pero nan ta wantá debí na falta di fondo.
Stigmatisashon
Ounke ku e stigmatisashon a baha hopi, e ta eksistí ainda, segun Margaritha. “Tin hende ta yega te na rant pafo di e bario, pasobra nan tin miedu di drenta. Pero e bario tin hopi kos den dje; kosnan hopi positivo. Nos ta mirando hopi kambio.” Margaritha ta invitá un i tur pa drenta sin miedu den e bario kaminda e mes tambe ta biba, i mira ku Koraal Specht ta un bario trankil.
Biblioteka Sentro di Bario Koraal Specht.
Koraal Specht ta den desaroyo i ta trahando tambe riba drechamentu di su infrastruktura. E hecho ku e habitantenan ta sostené otro, tambe ta un desaroyo positivo.
Ta keda un echo ku mester sigi traha riba e parti di prevenshon, i den e kuadro ei e bosero di Sentro di Bario Koraal Specht ta menshoná ku regularmente por mira polisnan ta patruyá. Pero, meskos ku ta sosodé den mas bario na Kòrsou, ainda por topa famianan desfunshonal i tambe bendementu di droga, entre otro, Margaritha ta indiká.
